Եգիպտոսի իսլամական ուժերն առաջիկա ուրբաթ օրը «Միասին՝ ընդդեմ բռնության» կարգախոսով միլիոնանոց ցույց կանցկացնեն` կոչ անելով դադարեցնել անկարգությունները, որը հեղափոխության 2-րդ տարելիցի օրվանից` 2011 թ. հունվարի 25-ից շարունակվում է երկրի շատ քաղաքներում: Բողոքի ցույցի կազմակերպման գլավոր վայրը Կահիրեի համալսարանի մոտ գտնվող հրապարակն ու շրջակա փողոցներն են լինելու:
Ցույցի դուրս գալու կոչ է արել իսլամական «Ալ-Գամմա ալ-Իսլամ» խմբավորումը: Նրանց քաղաքական միավորման` «Արարում և զարգացում» կուսակցության հատուկ հայտարարության մեջ կոչ է արվել ցույցերի ժամանակ իրենց հայացքների և քաղաքական կողմնորոշումների արտահայտման համար կիրառել միայն խաղաղ միջոցներ:
«Մուսուլման եղբայրներ» շարժումը հայտարարել է ցույցերին իրենց սիմվոլիկ մասնակցության մասին:
Պահպանողականները, հավանություն տալով ցույցի նպատակներին, հրաժարվել են փողոց դուրս գալ` մեկնաբանելով որ տնտեսական և քաղաքական ոչ դյուրին պայմաններում, որում ներկայումս Եգիպտոսն է, նպատակահարմար չեն զանգվածային հանրահավաքները, որոնք էլ ավելի են բարդացնում իրավիճակը և կարող են էլ ավելի սրել հասարակության մեջ տիրող լարվածությունը:
Ցույցերին իրենց մասնակցության մասին հայտարարել են ավելի քան 30 եգիպտական երիտասարդական խմբեր, որոնք մտադիր են ընդդիմանալ ներկայիս իշխանություններին` ստիպելու նրանց իրականացնել հունվարյան հեղափոխության բոլոր նպատակները: Ցույցին մասնակցելու մտադրությունից հրաժարվել են առավել կազմակերպված երիտասարդական խմբերը, ինչպիսիք են «Ապրիլի 6» կազմակերպությունն ու «Ազգային փրկության ճակատի» երիտասարդական թևը:
