Մերիլին Մենսոնը, ով ներկա պահին իր Pale ալբոմով շրջագայություններ է կատարում, տուժել է բարում տեղի ունեցած կռվի ժամանակ, հաղորդում է TMZ-ը:
Դեպքը տեղի է ունեցել ապրիլի 5-ի գիշերը Կանադայի Ալբերտա նահանգում տեղի ունեցած համերգից հետո: Մամուլի տվյալների համաձայն՝ երաժիշտը մտել է Denny’s հաստատությունը, որպեսզի ընթրի, իսկ այնտեղ նրա վրա է հարձակվել հարբած մի տղամարդ:
Ոստիկանությունում հրաժարվել են նշել կռվի մասնակիցների անունները, հայտնի է միայն, որ 46-ամյա Մենսոնը նրանց թվում է եղել: Կատարվածի ականատեսները պնդում են, որ Մենսոնին են մոտեցել երկու աղջիկներ և խնդրել են լուսանկարվել իրենց հետ, սակայն մերժում են ստացել: Դրանից հետո երաժիշտը նրանցից մեկի հասցեին վիրավորանքներ է հնչեցրել, որն էլ գրավել է հաստատության հաճախորդների ուշադրությունը: Հարբած տղամարդը հարձակվել է Մերիլինի վրա և հարվածել նրա դեմքին: Արտիստի ներկայացուցիչները հերքում են, թե նա վիրավորել է աղջիկներին:
