Այսօր վաղ առավոտից բերման են ենթարկում Հիմնադիր խորհրդարանի անդամներին: «Առաջին լրատվական»-ի հետ զրույցում ԼՂՀ ԱԺ անկախ պատգամավոր Վահան Բադասյանը նշեց, որ կատարվածը սպասելի էր:
Նրա խոսքով՝ ԼՂՀ-ում Հիմնադիր խորհրդարանի անդամներ չկան, կան համակիրներ, բայց սպասելի էր, որ այսպես պետք է վարվեն, Ժիրայր Սեֆիլյանը սպասում էր սրան. «Հայաստանի ընդդիմադիր դաշտում ընդդիմություն չկա, ընդդիմադիր դաշտում ռեալ մնացել է միայն Հիմնադիր խորհրդարանը, որի հետ օրենքից դուրս ինչպես ուզում են, այնպես էլ վարվում են»:
Վահան Բադասյանի կարծիքով՝ ռեժիմը ոչ թե խուճապի մեջ է, այլ հոգեվարքի, որովհետև ռեժիմը չունի ընդդիմություն, այդ տեսակետից ռեժիմը շատ ուժեղ է, բայց արի ու տես, որ ռեժիմի հոգեվարքի պատճառը երկրի տնտեսական շատ վատ վիճակն է։
«Ունենք իշխանություն, որը երկրի ինքնիշխանությունը հանձնել է Ռուսաստանի Դաշնության ղեկավարությանը, և սա փաստ է, որովհետև մեր երկրի ողջ եկամուտները հիմա հոսում են դեպի Ռուսաստանի բյուջե, այսպես կոչված՝ Մաքսային միություն, մենք զրկված ենք եկամուտներից, զրկված ենք արտադրություն կազմակերպելու հնարավորությունից, և այս տեսակետից ռեժիմը և Հայաստանի իշխանությունները հոգեվարքի մեջ են»,- ասաց նա:
Վահան Բադասյանի խոսքով՝ սրա կողքին Հայաստանում կան ընդդիմադիր կազմակերպություններ՝ ի դեմս Հիմնադիր խորհրդարանի, որը հանդգնում է ռեժիմի դեմ դուրս գալ: «Բնականաբար, իրենք չպետք է հանդուրժեն, որովհետև առանց այն էլ իրենք վատ վիճակում են: Եթե նույնիսկ Հիմնադիր խորհրդարանին բռնեն էլ, երկրից արտաքսեն էլ, եթե նույնիսկ բոլորին ֆիզիկապես ոչնչացնեն էլ, ապա միևնույն է՝ ռեժիմի հոգեվարքը չի փոխվում, որովհետև դրությունը վատ է, երկիրը պահել չեն կարողանում արդեն, այս իշխանությունները իրենց սպառել են»,- ասաց նա՝ հավելելով, որ ապրիլի 24-ը պարզապես պատրվակ էր, որպեսզի Հիմնադիր խորհրդարանին «վնասազերծեն»։
