Միացյալ Թագավորության խորհրդարանի վերին պալատի անդամ լորդ Նազիր Ահմեդը «Եվրոպայի մուսուլմանների սոցիալական կապերի նախաձեռնություն» կազմակերպության կողմից անցկացված իսլամաֆոբիայի, ծայրահեղականության և քսենոֆոբիայի վերաբերյալ համախորհրդակցության շրջանակներում մեկնաբանելով Ֆրանսիայում խոսքի ազատության հարցը՝ անդրադարձել է նաև Հայոց ցեղասպանության ժխտումը քրեականացնելու խնդրին: Այս մասին հաղորդում է թուրքական «Անադոլու» լրատվական գործակալությունը։
Լորդ Ահմեդը նշել է, որ «Շառլի Էբդո» պարբերականի խմբագրության վրա կատարված հարձակումից հետո խոսքի ազատության անհրաժեշտությունը կրկին հայտնվել է օրակարգում:
«Միայն Հոլոքոստը ժխտողներին կարելի է պատասխանատվության ենթարկել: Եթե խոսքի ազատությունն այդքան կարևոր է, ապա ինչո՞ւ են ֆրանսիացիները Հայոց ցեղասպանությունը ժխտողներին ստիպում խոսել այդ մասին»,- ընդգծել է խորհրդարանականը:
Հիշեցնենք, որ հունվարի 7-ին Փարիզում ահաբեկիչները հարձակվել են «Շառլի Էբդո» շաբաթաթերթի խմբագրատան վրա։ Հունվարի 8-ին մայրաքաղաքում զինված անձինք հարձակվել էին ոստիկանի վրա: Երրորդ օրը պատանդներ էին վերցվել Փարիզում և Դամարտեն ան Գոելում: Ընդհանուր առմամբ 3 օրում զոհվել էր 17 մարդ։ Ֆրանսիայի ուժայինների իրականացրած հատուկ գործողությունների արդյունքում հունվարի 9-ի ընթացքում երեք ահաբեկիչներ ոչնչացվել էին:
