ՀՀԿ պատգամավորը երկրորդ նախագահին հուշում է, որ իր օրոք ավելի մեծ ոճրագործություն է եղել, քան Գյումրիի դեպքը Գյումրիի ոճրագործությունից հետո ՀՀ երկրորդ նախագահ Ռոբերտ Քոչարյանը քննադատել էր իշխանություններին և մեղադրել Գյումրիում բախումները չկանխելու համար:
Ըստ նրա՝ իշխանությունները «կայծակնային առաջանցիկ գործողություններ» պետք է անեին և հայտարարեին, որ ոճրագործությունը պետք է հետաքննվի հայաստանյան իրավապահ մարմինների կողմից: Ռոբերտ Քոչարյանը նշել էր, որ ներկայիս պաշտոնյաների լղոզված, իրարամերժ և շփոթված հայտարարությունները յուղ են լցրել կրակի վրա և լարված իրավիճակին ազգային նվաստացման երանգ հաղորդել:
Այս առնչությամբ Aravot.am-ի հետ զրույցում ՀՀԿ պատգամավոր Արտակ Դավթյանը երկրորդ նախագահի քննադատությանն ի պատասխան՝ ասել է. «ՀՀ յուրաքանչյուր քաղաքացի կարող է իր դիրքորոշումն արտահայտել, բայց ուղղակի ասեմ՝ 11 օր հետո անդրադառնալ Գյումրիի ողբերգությանը, դա, ըստ էության, խիստ կայծակնային անդրադա՞րձ էր՝ ըստ երկրորդ նախագահի: Սա՝ մեկ: Կարծում եմ, որ երևի թե մենք իրականում խնդիր ունենք մեր նախկին նախագահների ինստիտուտ ստեղծելու առումով, որովհետև ես կոնկրետ, որպես ՀՀ քաղաքացի, շատ ավելի դրական հպարտ կլինեի, եթե հենց նույն օրը ՀՀ նախկին երկու նախագահները և գործող նախագահը հանդիպեին, քննարկեին իրավիճակը և իրավիճակից բխող հայտարարություններ անեին: Ցավոք, սա նշանակում է, որ իրոք մեզ փոփոխություններ են անհրաժեշտ: Երկրորդ նախագահը, քննադատելով ներկա իշխանություններին, ասում է՝ մեզ փոփոխություններ են անհրաժեշտ: Լավ կլիներ, որ ասեր՝ մեզ սահմանադրական փոփոխություններ են անհրաժեշտ: Այդ ամենը նախագահական կամ կիսանախագահական համակարգի անկատարության մեջ է: Նաև նրա մեջ եմ խնդիր տեսնում, որ դառնում են նախկին նախագահ և քննադատում ներկայիս իշխանություններին: Այն, որ իշխանություն կրողներն են այդպիսին դառնում, դա մեզ համար նորություն չէ, բայց որ առաջին նախագահը կարող է դառնալ ամենաարմատական ընդդիմադիրը, այն էլ այն դեպքում, երբ հաջորդ նախագահին, ըստ էության, ինքն է հրավիրել իշխանական համակարգ, ճի՞շտ է: Այնուհետև երկրորդ նախագահն է դառնում քննադատող, այն պարագայում, երբ գիտենք, որ գործող նախագահը նախագահի իր թեկնածուն էր: Այս ամեն ինչը անհասկանալի է: Սա ըստ էության նշանակում է, որ գործող կառավարման համակարգն իսկապես լուրջ վերափոխման անհրաժեշտություն ունի»:
Մանրամասները՝ սկզբնաղբյուր կայքում
