Ոստիկանապետ Վովա Գասպարյանը երեկ լրագրողների հետ զրույցում անդրադարձել է մի քանի շաբաթ առաջ վարչապետ Հովիկ Աբրահամյանի հայտարարած մտքին, որ առաջիկայում միավորված տարածքային կառավարման և արտակարգ իրավիճակների նախարարությունները կմիավորվեն մեկ այլ ընդհանուր նախարարության մեջ՝ ներքին գործերի նախարարության:
Վովա Գասպարյանը հայտարարել է, որ իր կարծիքով ոստիկանությունն ավելի ճիշտ է, քանի որ ապակուսակցական մարմին է, ոստիկանապետը կուսակցական չէ և չի ենթարկվում կուսակցական ճնշման:
Վովա Գասպարյանի այս հայտարարությունը շատ հատկանշական է և վկայում է, որ ներքին գործերի նախարարության վերաբերյալ Հովիկ Աբրահամյանի հայտարարությունն անցած ժամանակահատվածում իշխանության օղակներում ոչ թե ամրացել է որպես որոշում, այլ դարձել է ներքին համակարգային պայքարի առարկա, և առկա են տարբեր կարծիքներ: Այլապես, որոշման պարագայում Վովա Գասպարյանը անկասկած չէր հայտարարի, որ իր կարծիքով ճիշտ է ոստիկանությունը:
Սակայն ոստիկանապետ Գասպարյանը ավելին է հայտարարում՝ խոսում է կուսակցական ճնշումների մասին` ամենայն հավանականությամբ ակնարկելով, որ խնդիրը վերաբերում է ներքաղաքական անցուդարձին, և Հովիկ Աբրահամյանի հայտարարությունները եղել են քաղաքական դրդապատճառներով, ոչ թե կառավարության օպտիմալացման, ինչպես հայտարարել էր Վովա Գասպարյանը: Այլ կերպ ասած` Գասպարյանն ակնարկում է, որ Հովիկ Աբրահամյանի ցանկությունը ոստիկանությունը քաղաքական վերահսկողության տակ առնելն է:
Ի՞նչ է մտածում այս մասին Սերժ Սարգսյանը` որևէ մեկին պարզ չէ, այս թեմայով հայտարարություններ նա չի արել: Սակայն կարելի է ենթադրել, որ եթե Հովիկ Աբրահամյանը ձգտում է ոստիկանությունը վերցնել քաղաքական վերահսկողության տակ, Սերժ Սարգսյանն այդ պրոցեսին դեմ կլինի, եթե իհարկե` պարզապես ստիպված չլինի այդ ահռելի լծակը դնել Հովիկ Աբրահամյանի տրամադրության տակ:
Այս խնդիրը երևի թե խոստանում է ներիշխանական հետաքրքրական զարգացումներ: Համենայնդեպս, այն, որ ոստիկանապետը նախընտրել է արտահայտվել նմանօրինակ քաղաքական ենթատեքստով` վկայում է այն մասին, որ իշխանական խոհանոցում հարցը բավական ակտիվորեն հունցվում է:
