ՀՀ տնտեսական մրցակցության պաշտպանության պետական հանձնաժողովը հայաստանյան մի շարք ընկերությունների ներկայացուցիչների հետ այսօր քննարկում էր Եվրասիական տնտեսական միությանը Հայաստանի անդամակցությունից հետո ԵՏՄ տարածքում ՀՀ տնտեսվարողների շահերի պաշտպանության խնդիրներին առնչվող հարցեր:
ՏՄՊՊՀ նախագահ Արտակ Շաբոյանը քննարկման ժամանակ նշեց, որ ինքը կարևորում է, որ հայ արտադրողները գործեն հավասար պայմաններով ու մրցակից ընկերությունների հետ ունենան հավասար իրավունքներ: Արտադրողները, սակայն, բազմաթիվ մտահոգություններ ունեն՝ կապված նույն հավասար մրցակցային պայմանների, ապրանքային նշանի օգտագործման, Հայաստանում գործող ավելացված արժեքի հարկի և բազմաթիվ այլ խնդիրների հետ:
«Իհարկե, հայ գործարարների համար նոր հեռանկարներ են բացվում, բայց, մյուս կողմից, մենք կանգնում ենք որոշակի ռիսկերի և մարտահրավերների առաջ: Խոսքը վերաբերում է ոչ միայն արտահանման շուկային, այլև մեր ներքին շուկային: Ներքին շուկայում Հայաստանը դեղամիջոցների նկատմամբ կիարառում է 20 տոկոս ԱԱՀ, այնինչ այլ երկրներում դրույքաչափը զրոյական է կամ 10 տոկոս»,- լրագրողների հետ զրույցում ասաց «Լիկվոր» դեղագործական ընկերության տնօրեն Սերգեյ Մաթևոսյանը՝ հավելելով, որ դեղերի շրջանառությունն այլևս այդքան հեշտ չի լինելու, իսկ գնային նվազեցումներ, չնայած դեռ ոչ հստակ վիճակին, ամեն դեպքում չեն լինելու:
«ԷԿՈ կաթ» ընկերության տնօրենը ևս խնդիր է տեսնում ԱԱՀ-ի հետ կապված, որը տարբերակված է գործում ռուսական շուկայում: «Մենք այդ դաշտում ոչ հավասար մրցակցային պայմաններում ենք հայտնվելու»,- ասաց Արթուր Մովսիսյանը:
ՏՄՊՊՀ նախագահ Արտակ Շաբոյանը հանգստացրեց նրանց՝ նշելով, որ բոլոր հարցերը, ընկերությունների հակամրցակցային գործունեությունը և այլ նմանատիպ հարցեր առաջացման դեպքում կքննարկվեն ԵՏՄ մրցակցության հարցերի հանձնաժողովում: Անհրաժեշտության դեպքում վարույթներ կհարուցվեն, և տույժ-տուգանքներ կսահմանվեն:
Առավել մանրամասն՝ տեսանյութում:
