Apple ընկերությունը չի թողարկի iPhone սմարթֆոնի էժան տարբերակներ՝ ի հեճուկս ավելի վաղ մամուլում հայտնված այն տեղեկությունների, որ նման մոդելի մշակման ուղղությամբ արդեն կատարվում են աշխատանքներ: Այս մասին չինական Shanghai Evening News-ին հաղորդել է Apple-ի մարկետինգի հարցով տնօրեն Փիլ Շիլլերը:
Այս շաբաթ ավելի վաղ արևմտյան դիտորդները, հղում կատարելով Apple-ի անանուն աղբյուրներին, հայտնել էին, որ ընկերությունը մշակում է iPhone-ի էժան տարբերակ, որը ծրագրվում է զարգացող երկրների շուկա բաց թողնել մինչև այս տարեվերջ՝ 99-149 դոլար արժեքով:
Թերթին տված հարցազրույցում Շիլլերը հերքել է այդ տեղեկությունը:
«Դա այն ուղղությունը չէ, որով ցանկանում ենք զարգացնել մեր ապրանքը»,- ասել է նա:
Լուրերն այն մասին, որ Apple-ը պատրաստվում է թողարկել iPhone-ի էժան տարբերակ, պարբերաբար են հայտնվում, սակայն դրանք պաշտոնապես չեն հաստատվում:
