Մայրաքաղաքում չինարենի խորացված ուսուցմամբ դպրոց կառուցելու նախագիծն ընդգրկվել է ՀՀ կառավարության վաղվա նիստի օրակարգում, և եթե այն արժանանա գործադիրի հավանությանը, չինական կողմի մասնագետները կժամանեն Հայաստան ու Երևանում կսկսեն դպրոց կառուցել:Այս մասին հայտնում է «Փաստինֆո»-ն:
Ի դեպ, կառավարության նիստի օրակարգում ընդգրկված նախագծից պարզ է դառում, որ արդեն հայտնի է նաև ապագա դպրոցի տեղը: Դրա համար չինական կողմին կտրամադրվի Զ.Սարկավագի 14 հասցեում գտնվող Հ.Գյուլիքեխվյանի անվան N103 ավագ դպրոցին պատկանող 1.45028 հա հողամասը`դրա վրա կառուցված շենք-շինություններով:
Բայց մինչ չինացիները կսկսեն տարածքում շինարարություն անել, ՀՀ կառավարությունը նախապես կքանդի այդ շինությունները, կմաքրի տարածքը և այն կապահովի էլեկտրաէներգիայով, ջրով, կապով:
Դե իսկ ավագ դպրոցի սաներին ու մանկավարժներին մինչև շինարարության ավարտը ժամանակավորապես կտեղափոխեն Ս.Շահմուրադյանի անվան N 85 հիմնական դպրոց:
Ի դեպ, Հայաստանում չինարեն ուսուցմամբ դպրոց ունենալը չինական կողմին կարժենա ավելի քան 20 մլն ԱՄՆ դոլար, քանի որ երկու երկրների կառավարությունների միջև 2012 և 2013թթ ստորագրված «Տեխնիկատնտեսական համագործակցության մասին» համաձայնագրերով՝ Չինաստանը ՀՀ կառավարությանը պետք է տրամադրի շուրջ 170 մլն յուանի (շուրջ 27 մլն.ԱՄՆ դոլար) անհատույց օգնություն:
Մանրամասները՝ «Փաստինֆո»-ում
