Այսօր Եգիպտոսի մայրաքաղաքի 3 հրապարակները լցված էին նախագահի և երկրի հիմնական օրենքի կողմնակիցներով ու հակառակորդներով:
Թահրիր հրապարակում, որտեղ արդեն մի քանի շաբաթ տեղակայված են ընդդիմադիրների վրանները, այս ժամերին հավաքվում են սահմանադրության հակառակորդները: Նրանց հիմնական նշանաբանն է՝ «ո՛չ սահմանադրությանը»։ Ընդդիմադիր «Ազգային փրկության ճակատ»–ը վերջնական որոշում է կայացրել մասնակցել հանրաքվեին` դեմ քվեարկելով:
«Մուսուլման եղբայրներ» խմբավորման հարյուրավոր կողմնակիցներ հավաքվել են Ռաբիաթ Ալ-Ադաուիյա մզկիթում: Իմամն իր ելույթի ժամանակ ողջ զայրույթը թափել է քրիստոնյաների վրա, ովքեր աջակցում են ընդդիմությանը: Նրա խոսքերով՝ հիմա ոչ թե պայքար է մղվում սահմանադրության դեմ, այլ` իսլամի:
Մզկիթներում ցանկացած քարոզ վերածվում է նախագահի և սահմանադրության համար անցկացվող քարոզարշավի: Ավելին, շեյխ Հաշիմ Իսլամը, ով մի անգամ արդեն փայլել է իր «սպանել ցուցարարներին՝ որպես անհավատների» կոչով, հրապարակել է նոր կրոնական հրահանգ: Այնտեղ նա երկնային հատուցման սպառնալիքով արգելել է բոլորին դեմ արտահայտվել նախագահի՝ սահմանադրական հռչակագրին:
Ընդհանուր առմամբ՝ Կահիրեում իրավիճակը հանգիստ է, ինչը չենք կարող ասել Ալեքսանդրիայի մասին, որտեղ ոստիկանները ստիպված դիմել են արցունքաբեր գազի կիրառմանը:
Շաբաթ օրը` հանրաքվեի ժամանակ, անվտանգությունը կապահովվի 120 հազար զինվորականների, 130 հազար ոստիկանների և 6 հազար միավոր տեխնիկայի միջոցով: Սինայում բանակը տեղաբաշխում է 15 հազար զինվորների, քանի որ տեղեկություններ էր ստացվել, որ այդ շրջանում ահաբեկչական խմբավորումները դիվերսիա են կազմակերպում:
Դեկտեմբերի 15-ին Եգիպտոսի 10 մարզերի բնակիչներ հանրաքվեի միջոցով իրենց վերաբերմունքը կարտահայտեն սահմանադրության նոր նախագծի հանդեպ: Քվեարկության իրավունք ունեցողների թիվը 21 մլն է:
