«Հրապարակ» թերթը գրում է. «Կառավարության վերջին նիստին Հովիկ Աբրահամյանի անթաքույց զայրույթն իր ղեկավարած կաբինետի որոշ անդամների համար անհետևանք չի մնալու: Կառավարության մեր աղբյուրները հայտնեցին, որ վարչապետի զայրույթը պայմանավորված է եղել մի քանի օր առաջ տեղի ունեցած իր և գործարարների հանդիպումով, ավելի ճիշտ՝ դրանից հետո որոշ գերատեսչություններում կատարած ուսումնասիրություններով: Ինչպես հայտնի է՝ օգոստոսի 15-ին Հովիկ Աբրահամյանը երկրորդ հանդիպումն էր կազմակերպել Հայաստանի գործարարների և հատկապես արտահանողների հետ, որպեսզի քննարկեն Ռուսաստանի շուկայի նոր բացված հնարավորությունները և մեծացնեն հայրենական արտադրանքի արտահանումը:
Գործարարները հանդիպման ընթացքում դժգոհել են, որ պատասխանատու գերատեսչություններն արտահանողներին չեն աջակցում ու գործարարների հետ ակտիվ չեն աշխատում, ինչից հետո Աբրահամյանը կարգադրել է ուսումնասիրել գերատեսչությունների և հատկապես տնտեսական բլոկի աշխատանքը, արդյունքում պարզվել է, որ դրանք իսկապես անգործության են մատնված։
Հովիկ Աբրահամյանն առաջիկայում մտադիր է կադրային փոփոխություններին զարկ տալ՝ փոխնախարարների, վարչության պետերի մակարդակով: Ասացին, որ հիմնական թիրախում մարդիկ են, ովքեր Տ. Սարգսյանի ժամանակ իրենց շատ ինքնավստահ ու պաշտպանված են զգացել։
Մանրամասները՝ թերթի այսօրվա համարում
