ԱՄՆ պետքարտուղարությունը խորապես անհանգստացած է վերջին օրերին հայ-ադրբեջանական սահմանին լարվածության սրման կապակցությամբ: Այս մասին, ինչպես հաղորդվում է, Պետդեպի կայքում, Վաշինգտոնում տեղի ունեցած ճեպազրույցում հայտարարել է պետքարտուղաղարության ներկայացուցիչ Ջեն Պսակին:
«Մենք նախ խոր անհանգստություն ենք հայտնում հուլիսի 31-ից հետո լարվածության սրման հետևանքով զգալի թվով զոհերի համար և մեր ցավակցությունն ենք հայտնում զոհերի և վիրավորների հարազատներին: Մենք կոչ ենք անում կողմերին անհապաղ քայլեր ձեռնարկել լարվածությունը թուլացնելու համար և հարգել կրակի դադարեցման ռեժիմը: Այս խնդրի համար ռազմական լուծում հնարավոր չէ»,- ասել է Պսակին:
Պետքարտուղարության ներկայացուցիչը նշել է, որ վրեժխնդրությունը և շարունակվող բռնությունը միայն ավելի են բարդացնում խաղաղ կարգավորման հնարավորությունը:
«ԱՄՆ-ը՝ որպես ԵԱՀԿ Մինսկի խմբի համանախագահ երկիր, նախկինի պես պատրաստ է օգնել կողմերին հասնել հակամարտության կարգավորմանը»,- ասել է Պսակին:
