Google կորպորացիայի փոխնախագահ Google+ սոցցանցի զարգացման համար Բրեդլի Հորովիցը Facebook-ն անվանել է անցյալի սոցցանց: Ինչպես հաղորդում է CNET-ը՝ նման հայտարարությունը Հորովիցն արել է Business Insider պարբերականի կոնֆերանսին:
Google-ի փոխնախագահը հայտարարել է, որ Facebook-ը չի համապատասխանում իրական աշխարհի պահանջներին: Նրա խոսքով՝ մարդիկ պետք է հնարավորություն ունենան շփվելու ընկերների հետ՝ առանց այլ անձանց մասնակից դարձնելու: Եվ դրանք պետք է լինեն «նորմալ» զրույցներ, ոչ թե 140 նիշանոց արտահայտություններ, ինչպես Twitter-ում՝ հավելել է Հորովիցը:
Բացի այդ, Հորովիցը քննադատել է Facebook-ի ընկերների ժապավենում գովազդի ցուցադրումը: Նա նկատել է, որ նման մեխանիզմն այնքան էլ արդյունավետ չէ, քանի որ չի համապատասխանում սպառողների ներկա ահանջներին:
Հորովիցը սոցցանցի կառուցվածքի դրական օրինակ է համարել սեփական արտադրանքը, որը ստեղծողները, նրա խոսքով՝ «մտածել են իրական աշխարհի մասին»: Google+ ցանցի առանձնահատկություններից մեկը հանդիսանում է ընկերների խմբերը՝ Circles-ը: Օգտատերը կարող է անձամբ որոշել, թե որ «շրջանակները» կարող են տեսնել իր տեղադրած այս կամ այն նյութը:
Խոսելով գովազդից` նա նշել է, որ արդյունավետ է օգտատիրոջը խորհուրդ տալ այն պահին, երբ նա այս կամ այն ապրանքը, կամ սնվելու վայրն է փնտրում: Լրագրողի այն հարցին՝ Google+ ցանցում կհայտնվե՞ն գովազդային հայտարարություններ, Հորովիցը պատասխանել է` միայն այն դեպքում, երբ գտնվի դրանք արդյունավետ ցուցադրելու և օգտատերերին չզայրացնելու միջոց:
