Բրիտանական Rolling Stones ռոք խումբը, որն այս տարի նշում է իր ստեղծման 50-ամյակը, բեմ է վերադառնում ամբողջական կազմով և այսօրվանից հոբելյանական մինի շրջագայություն սկսում լոնդոնյան О2 արենայից:
Խումբը ծրագրել է 5 շոու, որոնցից երկուսը` Լոնդոնում (երկրորդ համերգը տեղի կունենա նոյեմբերի 29-ին), և երեքը` ԱՄՆ-ում: Դեկտեմբերի 5-ին խումբը ելույթ կունենա Բրուկլինում, իսկ դեկտեմբերի 13-ին և 15-ին` Նյուարքում: Այս մասին հայտնում է RIA Novosti-ն:
Rolling Stones-ն այս տարի հետևողականորեն ամրապնդում է իր հեղինակությունը որպես պատմության ամենահաջողակ ռոք-ն-ռոլ խումբ, չնայած այն բանին, որ մասնակիցների միջին տարիքը 68-ն է: Երաժիշտները թողարկել են ֆոտոալբոմ, մասնակցել իրենց մասին վավերագրական ֆիլմի նկարահանումներին, որը ներառվել է Լոնդոնյան կինոփառատոնի ծրագրում, ձայնագրել են երկու նոր ստեղծագործություններով համալրված լավագույն երգերի Grrr! հավաքածուն, կարճատև ելույթներով հայտնվել Փարիզում, իսկ մի քանի ամիս առաջ նրանց հոբելյանական համերգների տոմսերը համացանցում վաճառվել են ընդամենը 7 րոպեում:
Բեմում ելույթ կունենա «ոսկե» կազմը` Միք Ջագեր, Քիթ Ռիչարդս, Ռոնի Վուդ և Չառլի Ուոթս: Խմբի երկու նախկին անդամները` Բիլ Ուայմենն ու Միք Թեյլորը լոնդոնյան շոուի ժամանակ կմիանան նրանց:
Rolling Stones-ի ավելի քան 20 ալբոմներն աշխարհում վաճառվել են 250 միլիոն օրինակով: 1989-ին խումբը ներառվել է ռոք-ն-ռոլի փառքի սրահում, 2004-ին Rolling Stone ամսագրի վարկածով զբաղեցրել է բոլոր ժամանակների 50 խոշոր կատարողների ցուցակի 4-րդ հորիզոնականը:
