ՀՀ փոխվարչապետ, տարածքային կառավարման նախարար Արմեն Գևորգյանը Դիլիջանում ծանոթացել է քաղաքի զարգացման ծրագրերի ընթացքին:
ՀՀ տարածքային կառավարման նախարարության հասարակայնության հետ կապերի բաժնից «Առաջին լրատվական»-ին հայտնում են, որ փոխվարչապետը Տավուշի մարզպետ Արմեն Ղուլարյանի և քաղաքապետ Արմեն Սանթրոսյանի ուղեկցությամբ նախ այցելել է ՀՀ կենտրոնական բանկի «Դիլիջան ուսումնահետազոտական կենտրոն»-ի շինհրապարակ: Պատասխանատուների տեղեկացմամբ’ աշխատանքներն իրականացվում են սահմանված ժամանակացույցի համապատասխան, շենքը նախատեսվում է շահագործման հանձնել նախանշված ժամկետներում’ 2013թ. տարեսկզբին: Փոխվարչապետին ներկայացվել է նաև կենտրոնի բազմաբնակարան բնակելի շենքի շինարարական աշխատանքների ընթացքը:
Արմեն Գևորգյանը եղել է նաև Դիլիջանի համայնքային քոլեջում և Դիլիջանի թիվ 2 դպրոցում: Մարզի առաջնահերթ խնդիրների լուծման երրորդ ծրագրով հատկացված 23 մլն դրամով արդեն ավարտվել է քոլեջի տանիքի վերանորոգումը, իսկ չորրորդ ծրագրով 25 մլն դրամ է հատկացված թիվ 2 դպրոցի տանիքի նորոգման համար:
Փոխվարչապետն «Էրեբունի» բժշկական կենտրոնի գլխավոր տնօրեն Հարություն Քուշկյանի ուղեկցությամբ այցելել է Դիլիջանում կառուցվող ախտորոշիչ բժշկական կենտրոնի շինհրապարակ: Մասնավոր ներդրումներով կառուցվող կենտրոնի շինարարական աշխատանքները մեկնարկել են երեք ամիս առաջ և նախատեսվում է ավարտել մինչև տարեվերջ: Պատասխանատուների ներկայացմամբ’ ժամանակակից պահանջներին համապատասխանող և արդիական սարքավորումներով հագեցած ցերեկային ստացիոնարով բուժհաստատությունը կունենա ռադիոլոգիական կենտրոն’ համակարգչային տոմոգրաֆ, սրտի, աչքի հիվանդությունների ախտորոշման, լաբորատոր տարբեր հետազոտություններ իրականացնելու հնարավորություն: Այն լինելու է տարածաշրջանում նման ծառայություններ մատուցող միակ կենտրոնը:
Քաղաքում շրջայցից հետո փոխվարչապետը խորհրդակցություն է անցկացրել Դիլիջանի քաղաքապետարանում’ մարզային և տեղական իշխանությունների ղեկավարների, ծրագրերի պատասխանատուների մասնակցությամբ: Քննարկվել են ծրագրերի ընթացքի, քաղաքում անհրաժեշտ ենթակառուցվածքների ստեղծմանն առնչվող հարցեր: Փոխվարչապետն ընդգծելով ծրագրերի դերը քաղաքի և տարածաշրջանի զարգացման հարցում, կարևորել է դրանք իրականացնելու գործում շահագրգիռ բոլոր կողմերի համագործակցված աշխատանքը:
Փոխվարչապետն այցելել է նաև Ծաղկաձոր, որտեղ ծանոթացել է «Մարիոթ» ապրանքանիշի չափորոշիչներին համապատասխան վերակառուցված հյուրանոցային համալիրի հնարավորություններին և պայմաններին: «ՀայՌուսգազարդ» ընկերությանը պատկանող «Ադիգազ» հանգստյան տունը կառավարման է հանձնվել «Մարիոթ ինթերնեյշնլ» ընկերության միջազգային հյուրանոցային ցանցին և վերակառուցվել: Փոխվարչապետը բարձր է գնահատել կատարված աշխատանքները’թե որակի, թե ծավալի առումով: Նա ընդգծել է ենթակառուցվածքների բարելավման կարևորությունը տարածքների համաչափ զարգացման տեսանկյունից և ողջունելի համարեց մարզերում միջազգային ապրանքանիշերի ցանցի ներդրումը:
