ԱԺ պատգամավորներ Էդմոն Մարուքյանի և Ալեքսանդր Արզումանյանի հեղինակած «Շահումով խաղերի ու խաղատների մասին» օրենքում փոփոխություններ և լրացումներ կատարելու մասին նախագիծը հունիսի 4-ին ԱԺ տնտեսական հարցերի մշտական հանձնաժողովի նիստում թեժ քննարկումների առիթ դարձավ:
Մարուքյանի խոսքով` գործող օրենքի համաձայն, խաղատներ մուտք չի կարող գործել քսանմեկ տարեկան անձը, դրա համար 200 հազար դրամ տուգանք է հասնում, սակայն օրենսդիրը բաց է թողել այն կետը, որով պիտի պարտավորություն սահմաներ խաղատան համար` ստուգելու խաղատուն մուտք գործող անձի տարիքը:
«Երկրորդ իրավակարգավորումը, որ առաջարկում ենք, այն է, որ անձը կարող է ինքն իր մուտքը խաղասրահներ սահմանափակել, որ ֆիզիկական անձը կարողանա սեփական դիմումի համաձայն իր մուտքը վեց ամսից երեք տարի ժամկետով սահմանափակել:
Սահմանափակ գործունակ ճանաչման ինստիտուտին է վերաբերում երրորդ իրավակարգավորումը: Մենք առաջարկում ենք մեկ քայլ առաջ գնալ, եթե կա նման վճիռ, այն լիազոր մարմնի միջոցով փոխանցվի խաղատներին, այդ անձանց տվյալները փոխանցվեն, և նրանց մուտքը կազինո սահմանափակվի»,- ասաց նա:
Մարուքյանին հարց ուղղեցին` հնարավոր չէ՞ արդյոք անձի մուտքը խաղատուն սահմանափակելու հնարավորություն ընձեռել նրա հարազատներին, քանի որ տվյալ անձը միշտ չէ, որ այդ գիտակցությունը կարող է ունենալ: Մարուքյանը պատասխանեց, որ այս դեպքում կբախվեն մարդու իրավունքների խախտման խնդրին: Անդրադառնալով նոր իրավակարգավորման միջազգային փորձին` պատգամավորը նշեց, որ նման փորձ կա ԱՄՆ-ում, Կանադայում և մի քանի այլ երկրներում:
ՀԱԿ խմբակցության պատգամավոր Հրանտ Բագրատյանը նշեց, թե նրանք, ովքեր համատեղ սեփականություն են վարում, պիտի իրավունք ունենան դիմելու համապատասխան մարմիններին, որ իրենք համաձայն չեն, որ իրենց ամուսինը կամ եղբայրը խաղա: «Էս ձեր լուծումը. սա էլ կարող է լինել, բայց սա լուծում չէ, որովհետև որևէ մեկը ինքնակամ չի գնա դրան»,- ասաց նա:
«Մեզ մոտ հստակ է, ինքնակամ չի լինում, գնում են, կազինոյից ծեծելով հանում են: Օրինակ, ասենք, տեսուչը գնում է կազինո, ասում` ձեր բոլորի անձնագրերը պիտի նայեմ: Կարո՞ղ եք ինձ բացատրել` ինչ մեխանիզմով պիտի էդ տեսուչը կամ հսկիչը, որը մտել է իքս կազինո, իմանա` խախտում կա՞, թե՞ չէ, պիտի սովետական տարբերակով ասի` ձեր անձնագրերը տվեք, նայեմ: Էդ նույնն ա, որ վեչերնի պրավերկա անենք, էլի: Ես առաջարկում եմ` հստակեցվի, որ որևէ մեկը չմտնի ուրիշի գրպանը` անձնագիրը հանելու միտումով»,- ասաց նա` միաժամանակ համաձայնելով Բագրատյանի առաջարկին, որ խաղատուն անձի մուտքը սահմանափակվի նաև հարազատներից որևէ մեկի միջոցով:
Լուսանկարը՝ Photolure-ի
