ՄԱԿ-ը նոյեմբերի 10-ը հայտարարել է պակիստանցի Մալալա Յուսուֆզայի աջակցության օր: Այս մասին այսօր հայտարարել է ՄԱԿ-ի կրթության գործերով հատուկ հանձնակատար, Մեծ Բրիտանիայի նախկին վարչապետ Գորդոն Բրաունը: Այսօր Իսլամաբադում նա տեղի իշխանությունների հետ քննարկել է պակիստանցի աղջիկների՝ կրթություն ստանալու հարցը:
Ուրբաթ օրը հազարավոր բրիտանացիներ դիմել են կառավարությանը՝ 15-ամյա աղջկան Նոբելյան մրցանակի առաջադրելու խնդրանքով:
«Մալալան խոսում է ոչ միայն իր, այլև բոլոր այն աղջիկների անունից, որոնց թույլ չեն տալիս կրթություն ստանալ միայն սեռային պատկանելիությունից ելնելով»,- ասել է աղջկան աջակցող թիմի ակտիվիստներից մեկը:
Մալալան, ով Պակիստանում պայքարում էր կրթություն ստանալու կանանց իրավունքի համար, վիրավորվել էր թալիբների կողմից: Նա շարունակում է մնալ բրիտանական Բիրմինհեմ քաղաքի հիվանդանոցում: Նրա վիճակը ծանր է գնահատվում:
