«Զանգվածային միջոցառումները արտացոլում են պետական քաղաքականությունը: Մենք վատնում ենք գումարները և նման ենք այն ոչ տնտեսվար հասարակությանը, ով գումարները փոշուն է տալիս` այգիների բարեկարգմանը, Կոմիտասի այգու վերականգնմանը ուղղելու փոխարեն»,- այսօր լրագրողների հետ հանդիպմանը ասաց «Ժառանգություն» կուսակցության վարչության նախկին անդամ Կարինե Հակոբյանը:
Նրա խոսքով՝ դրանք արհեստական նպատակներ են հետապնդում ու ունեն մեկօրյա ազդեցություն: Նա անընդունելի համարեց ամեն տարի Երևանի տոնը նշելը. «Քաղաքը խրախճանքներով չեն սիրում, սիրում են կառուցելով, շենացնելով»,- ասաց նա:
Արվեստագետ Լևոն Իգիթյանն էլ իր հերթին նշեց, որ զանգվածային միջոցառումները չեն կարող զանգվածային լինել, և ինքը չի սիրում դրանք: «Ինձ համար նախ՝ Երևանի բնակիչներն են տոն: Երևանը բազմաթիվ գաղտնիքներ ունի, չգրված օրենքներ: Կորցնում ենք երևանյան նիստուկացը»,- ափսոսանքով արձագանքեց նա:
Անդրադառնալով քաղաքում տեղադրված արձաններին` Լ. Իգիթյանը նշեց, որ ինքը դրանք արվեստի գործ չի համարում, բայց չի ընդունում նաև դրանք ոչնչացնելու սովորույթը:
«Ամբոխի հոգեբանությունը ահավոր վտանգավոր բան է, այնտեղ առողջ բան չկա` որևէ մշակութային արժեք չի կարող այսպես ձևավորվել: Դրանք մշակութային արժեք չունեն: Պետք է կարողանալ այնպես անել, որ Չարենց կարդան, ոչ թե գան, նստեն և ձեռքը գցեն Չարենցի ուսին»,- նկատեց նա:
Լևոն Իգիթյանը անդրադարձավ նաև Վոլոչկովայի հետ Երևանի քաղաքապետ Տարոն Մարգարյանի լուսանկարներին և նշեց, որ Վոլոչկովային «որպես երևույթ, որպես արվեստի մարդ չի ընդունում: Նա վաղուց արվեստի մեջ չի, զբաղվում է կոմերցիայով: Նա այն մարդը չէ, որին ես կարող եմ լուրջ վերաբերվել»:
