Ոսկրածուծի դոնորների հայկական ռեգիստրի ամենամյա 7-րդ Walk of Life 2012 քայլամարաթոնին մասնակցել է Ararat Group-ը: Շաբաթ օրը տեղի ունեցած յոթերորդ քայլամարաթոնի շրջանակում ավելի քան 250 մասնակիցի հաջողվել է Ոսկրածուծի դոնորների հայկական ռեգիստրի համար հավաքել 50 հազար դոլար: Այս մասին հայտնում է Glendale News Press-ը:
Քայլերթ մեկնարկել էր Glendale Memorial հիվանդանոցից՝ բարձրացնելու հասարակության իրազեկվածությունը ոսկրածուծի փոխպատվաստման հարցում դոնորային համապատասխանության դժվարությունների բախված հիվանդների մասին: Քայլերթի մասնակիցները հասել են Հայաստանի հյուպատոսություն և վերադարձել նույն ուղով՝ ոսկրածուծի բազային ծավալները ընդլայնելու ռեգիստրի առաքելությանն աջակցելու համար:
Համաձայն ռեգիստրի վեբկայքի՝լեյկեմիայով և արյան հետ կապված այլ խնդիրներով տառապող հիվանդների միայն 25 տոկոսը կարող է համապատասխան դոնոր ընտրել հարազատների շարքից, հիվանդների 75 տոկոսը կարող է հույս դնել միայն անկախ դոնորների վրա:
Կազմակերպիչները նշել են, որ հերթական քայլամարաթոնի մասնակիցների ավելի քան 90 տոկոսը եղել են երիտասարդներ. սա նոր միտում է միջոցառման համար:
