Իրանը ՄԱԿ-ի և ԱՊԼ-ի հատուկ ներկայացուցիչ Լախդար Բրահիմիին է փոխանցել սիրիական ճգնաժամի կարգավորման մասին գրավոր առաջարկություն: Այս մասին հայտնում է ITAR-TASS-ը` հղում անելով իրանական արբանյակային «Ալ-Ալյամ» հեռուստաալիքին: Ալժիրցի դիվանագետը կիրակի Թեհրանում բանակցություններ է անցկացրել Իսլամական Հանրապետության նախագահ Մահմուդ Ահմադինեժադի և արտգործնախարար Ալի Աքբար Սալեհիի հետ:
Մամլո ասուլիսի ժամանակ Բրահիմին կրկնել է ՄԱԿ-ի գլխավոր քարտուղար Պան Գի Մունի կոչը Դամասկոսին` «իրականացել կրակի միակողանի դադարեցում, որին այնուհետև կհամաձայնվի նաև զինված ընդդիմությունը»: Բացի այդ, Բրահիմին նշել է հակամարտող կողմերին զենքի մատակարարումներից հրաժարվելու անհրաժեշտությունը: Իր ելույթում նա ընդգծել է «Սիրիայում բռնության դադարեցման առաջնահերթությունը»: Նրա խոսքով`«խաղաղ ծրագիրը կարող է քննարկվել միայն այն ժամանակ, երբ արյան գետերը կանգնեն»:
Հեռուստաալիքի տվյալներով` իրանական առաջարկությունը նախատեսում է ապստամբներին ռազմական աջակցության նվազեցում, իշխանության և ընդդիմության միջև երկխոսության առաջ քաշում, պայքարի ոչ բռնարար ձևի պահպանում, խորհրդարանական նոր ընտրությունների անցկացում:
Բրահիմին խոստացել է առաջարկությունները ներառել սիրիական ճգնաժամի խաղաղ կարգավորման նախագծում:
Իր հերթին Սալեհին հայտարարել է, որ Թեհրանում վստահում են ալժիրցի դիվանագետին, որը «չեզոք դիրքորոշում ունի»: Սալեհիի խոսքով` Իրանը կօգնի Բրահիմիին՝ իրականացնելու իր վրա դրված առաքելությունը:
Բրահիմին այսօր կուղևորվի Բաղդադ, որտեղ կհանդիպի Իրաքի վարչապետ Նուրի Ալ-Մալիկիի հետ:
