Այսօր հրավիրված մամլո ասուլիսի ընթացքում հոգեբան Մարիամ Մուրադյանը և իրավաբան Մարիաննա Եղիազարյանը խոսեցին թրաֆիքինգի` սպիտակ ստրկության սահմանների մասին:
Մարդը իր ներսում մշտապես ունի այն անհատական հոգեբանական առանձնահատկությունները, որ նրան կյանքում կդարձնեն ստրկության զոհ: Ընդհանուր տվյալներով կարող եմ փաստել, որ սպիտակ ստրկության զոհ են դառնում այն կանայք և տղամարդիկ, ովքեր մանկության տարիներին երկար ժամանակահատված ենթարկվել են բռնության սեփական ընտանիքի ներսում: Բռնության ենթարկվել ասելով՝ նկատի ունեմ, որ երեխան սեփական ծնողի ճնշումների ներքո դառնում է ինքն իր գերին: Այսինքն` կյանքում չունի նպատակ, ինքնավստահ չէ: Դեռահասը, որ պետք է սեփական ես-ի ձևավորման համար ունենա ներքին ռեսուրսներ, դա անել չի կարողանում և ամենահարմար առիթի դեպքում դառնում է մի կավատի գերի, որի արդյունքում էլ դառնում է թրաֆիքինգի զոհ»- նշեց հոգեբանը:
Իրավաբան Մարիաննա Եղիազարյանն էլ հավելեց, որ Հայաստանում թրաֆիքինգի զոհերի կոնկրետ թիվ չկա, որովհետև դատախազությունը և հասարակական կազմակերպությունները միշտ տալիս են վիճակագրական տարբեր տվյալներ: Եղիազարյանը նշեց նաև, որ իր սեփական ուսումնասիրություններով այսօր հայերի համար թրաֆիքինգի ուղղության սպառնալիք են Արաբական Միացյալ Էմիրությունները և Թուրքիան:
