Ուեյն Ռունին երկրորդ հիանալի հանդիպումն է անցկացրել Անգլիայի ընտրանու ավագի թևկապով: Աշխարհի 2014 թվականի առաջնության ընտրական փուլի շրջանակներում կայացած Սան Մարինոյի ընտրանու հետ հանդիպմանը նա դուբլ է հեղինակել և տեղ զբաղեցրել ազգային թիմի պատմության լավագույն հարձակվողների հնգյակում:
Ներկայումս Ռունին 31 գոլ է հեղինակել 77 հանդիպումներում և շրջանցել Թոմ Ֆինին, Նատա Լոֆթհաուսին և Ալան Շիրերին, ովքեր 30-ական գոլ են հեղինակել ազգային թիմում:
Ռունիի ցուցանիշը գերազանցում են 4 ֆուտբոլիստներ` Մայքլ Օուենը` 40, Ջիմի Գրիվզը` 44, Գարի Լինեկերը` 48 և Բոբի Չարլթոնը` 49: Սակայն քանի որ Ուեյնը միայն 10 օր անց կտոնի իր 27-ամյակը, նա ունի բոլոր շանսերն առաջին տեղը զբաղեցնելու նշված հնգյակում:
«Անչափ հպարտանում եմ այս նվաճումով: Ես դեռևս 26 տարեկան եմ և հուսով եմ, որ ավելի շատ գոլեր հեղինակելու հնարավորություն կունենամ»,- նշել է ֆուտբոլիստը:
