Շնորհավորելով Վազգեն Սարգսյանի ծննդյան 52-րդ ամյակը` Հայաստանի աֆղանական պատերազմի վետերանների միության ղեկավար, Ղարաբաղյան պատերազմի մասնակից, ԱԺ պատգամավոր Արմեն Մխիթարյանը նշեց, որ Վազգեն Սարգսյանը մեծ ավանդ է ունեցել մեր հայրենիքի և Արցախի ազատագրական շարժման, բանակաշինության գործում։
«Եթե նա ողջ լիներ, իհարկե ավելի լավ կլիներ, ավելի հեշտ կլիներ։ Վազգեն Սարգսյանը այն տղաներից էր, որ կարողացավ համախմբել բոլոր ջոկատներին, բոլոր զինված միավորումներին և հետագայում կարողացավ կազմակերպել Արցախյան ազատագրական շարժումը։ Նրա ավանդը շատ մեծ է, և մենք բոլորս հիշում ենք նրան ու պետք է հիշենք»,- նկատեց Արմեն Մխիթարյանը։
Անդրադառնալով Վազգեն Սարգսյան անհատի, ընկերոջ հետ կապված հուշերին` ավելացրեց. «Ես հիշում եմ առաջին կռիվները Մեղրիի մոտակայքում։ Առաջին անգամ կռիվ գնալուց առաջ միասին էինք մեր քոչարի պարը պարում Սասուն ջոկատի, Աֆոյի տղաների հետ միասին։ Այդ օրը միասին էինք, շատ լավ հուշեր են։ Նրա անձի հետ կապված հուշերը այնքան կենդանի են, այնքան խորիմաստ և միաժամանակ զգացմունքային, որ բառերը շատ հաճախ այն հզորությունը չունեն այդ ամենը փոխանցելու համար։ Մենք այդ պահերը ապրել ենք, այդ պահերը մեր մեջ են, ինչպես Վազգեն Սարգսյանը»։
