Այսօր ԱԺ նիստում 2011թ. բյուջեի կատարողականի ներկայացումից հետո հարցեր տալու ժամանակ ՀԱԿ պատգամավոր Նիկոլ Փաշինյանը, հղում կատարելով ԱԺ կանոնակարգին, որով թույլատրվում է հիմնական զեկուցողներին հարցեր տալ, պահանջեց ետ բերել ԱԺ նիստերի դահլիճից հեռացած վարչապետ Տիգրան Սարգսյանին. «Երբ ներկայացվեց Տիգրան Սարգսյանը, ասվեց, որ հիմնական զեկուցողին ձայն է տրվում: Հիմա ես հարցեր ունեմ հիմնական զեկուցողին, բայց նա այստեղ չէ: Հրավիրեք, որ հարցեր տամ»,- ասաց Փաշինյանը:
«Վարչապետի ելույթը քաղաքական է,- պատասխանեց նիստը վարող ԱԺ փոխխոսնակ Էդուարդ Շարմազանովը,- եթե ցանկանում եք հարցեր ուղղել վարչապետին, 16:30-ին հարցուպատասխան է` կարող եք ուղղել կամ ուղղեք պարոն Ջանջուղազյանին»:
«Իմ հարցը շատ բարձր որակավորում է պահանջում. եթե ուղղեմ պարոն Ջանջուղազյանին, նա կպատասխանի, որ նման որակավորում միայն վարչապետն ունի»,- հակադարձեց Ն. Փաշինյանը՝ և դիմելով դահլիճ մտած ԱԺ նախագահ Հովիկ Աբրահամյանին, կրկին պահանջեց ճշտել կանոնակարգը և ետ բերել Տ. Սարգսյանին, իսկ մինչ այդ իր հարցի իրավունքը հետաձգել:
Լուսանկարը՝ PanARMENIAN Photo-ի
