Սեպտեմբերի 27-28-ը Հռոմում էր գտնվում ՀՀ էկոնոմիկայի նախարար Տիգրան Դավթյանը:
ՀՀ ԱԳՆ մամլո գրաենյակից «Առաջին լրատվական»-ին հայտնում են, որ այցի առաջին օրը Տիգրան Դավթյանը հանդիպումներ է ունեցել Իտալիայի տնտեսական զարգացման նախարար Կ.Պասսերայի և Իտալիայի արտաքին առևտրի գործակալության նախագահ Ռ.Մոնտիի հետ:
Հանդիպումների ընթացքում ՀՀ էկոնոմիկայի նախարարը ներկայացրել է Հայաստանում առկա բիզնես մթնոլորտը և արտաքին ներդրումները խրախուսելու նպատակով ՀՀ կառավարության կողմից իրականացվող հետևողական քայլերը: Նախարար Դավթյանն ընդգծել է Հայաստանում արդեն իսկ հաջողությամբ գործող իտալական ընկերությունների գործունեությունը:
Նախարարը հատուկ անդրադարձ է կատարել Հայաստանում արդեն ստեղծված և ստեղծվելիք ազատ տնտեսական գոտիներին` նշելով, որ վերջիններիս առկայությունը առավել գրավիչ է դարձնելու Հայաստանը ներդրողների համար:
Տիգրան Դավթյանը նաև ներկայացրել է Ազատ առևտրի մասին համաձայնագրի ստորագրման շուրջ ԵՄ և Հայաստանի միջև վարվող բանակցությունների ընթացքը` մատնանշելով վերջինիս ստորագրման կարևորությունը Հայաստանի համար: Նախարարը նշեց, որ տվյալ պայմանագրի ստորագրման պարագայում Հայաստանը կհայտնվի տնտեսապես չափազանց շահեկան դիրքում` նկատի ունենալով ԱՊՀ երկրների հետ արդեն իսկ գործող նույնանման պայմանագրի առկայությունը:
Երկուստեք նշվել է, որ, թեև Հայաստանի և Իտալիայի միջև առևտրաշրջանառությունը 2011թ. կտրվածքով աճել է շուրջ 40%-ով, իսկ ընթացիկ տարվա վեց ամիսների կտրվածքով` գրեթե կրկնապատկվել, այնուամենայնիվ, երկու երկրների միջև առևտրաշրջանառության ներկայիս մակարդակը բավարար չէ, քանի որ երկու պետությունների միջև տնտեսական համագործակցությունն ունի շատ ավելի մեծ ներուժ:
Որպես լուրջ խթան հայ-իտալական տնտեսական հարաբերությունների զարգացմանը, նախարար Դավթյանը շեշտել է Հայ-իտալական միջկառավարական հանձնաժողովի ստեղծման կարևորությունը:
Զրուցակիցները գոհունակությամբ նշել են միջազգային վարկանիշային հեղինակավոր կազմակերպությունների կողմից Հայաստանին տրված գնահատականների աճը:
Այնուհետև, կողմերը քննարկել են Հայաստանում ենթակառուցվածքների զարգացման, տեղեկատվական տեխնոլոգիաների, հեռահաղորդակցման, քիմիական արդյունաբերության, շինանյութի արտադրության, դեղագործության և գյուղատնտեսության ոլորտներում համագործակցության մի շարք հարցեր:
Նույն օրը նախարար Դավթյանը հանդիպել է նաև Իտալիայի տարածքային կառավարման, զբոսաշրջության և սպորտի նախարար Պ.Նյուդիին:
Զրուցակիցները գոհունակություն են արտահայտել` Իտալիայից դեպի Հայաստան և հակառակ ուղղությամբ զբոսաշրջիկների թվի տարեցտարի արձանագրվող աճի կապակցությամբ:
Հանդիպման ընթացքում կարևորվել է երկու երկրների միջև զբոսաշրջության հոսքերի ավելացումը և մատնանշվեց զբոսաշրջային արդյունաբերության մեջ ներդրումների խրախուսման անհրաժեշտությունը:
Հանդիպման ավարտին երկու նախարարների կողմից ստորագրվել է «ՀՀ էկոնոմիկայի նախարարության և Իտալիայի տարածաշրջանային գործերի, զբոսաշրջության և սպորտի նախարարության միջև զբոսաշրջության բնագավառում համագործակցության մասին» Փոխըմբռնման հուշագիր:
Այցի երկրորդ օրը Հռոմի Առևտրի պալատի նստավայրում` պատմական Տեմպի Ադրիանի սրահում, անցկացվել է հայ-իտալական գործարար համաժողով: Հռոմում առաջին անգամ է տեղի ունենում ՀՀ էկոնոմիկայի նախարարի մասնակցությամբ գործարար համաժողով: Այն կազմակերպվել էր Իտալիայում ՀՀ դեսպանության, Հռոմի Առևտրի պալատի և Զարգացման Հայկական գործակալության կողմից և անցկացվել Իտալիայի տնտեսական զարգացման նախարարության հովանու ներքո:
Համաժողովի աշխատանքներին մասնակցել են 14 հայաստանյան և շուրջ 120 իտալական ընկերությունների ներկայացուցիչներ Իտալիայի Լացիո և այլ նահանգներից:
Համաժողովին ելույթներով հանդես է եկել ՀՀ էկոնոմիկայի նախարար Տիգրան Դավթյանը, Իտալիայում ՀՀ դեսպան Ռուբեն Կարապետյանը, Իտալիայի Առևտրի պալատի նախագահ Ջ.Կրեմոնեզին, Իտալիայի տնտեսական զարգացման նախարարության պետքարտուղար Կ.Դե Վինչենտին և երկկողմ առևտրային պալատների միության գլխավոր քարտուղարի տեղակալ Ս.Պետտինատոն:
Իրենց ելույթներում թե` Հայաստանի և թե` Իտալիայի պաշտոնյաները գոհունակությամբ նշեցին երկու երկրների միջև առևտրատնտեսական հարաբերությունների վերջին տարիներին արձանագրված դրական դինամիկան, միաժամանակ ընդգծելով այդ հարաբերությունների հետագա զարգացման կարևորությունը և դրա համար անհրաժեշտ բոլոր պայմանների առկայությունը:
Այնուհետև Զարգացման Հայկական գործակալության ներկայացուցիչը համաժողովի մասնակիցներին համառոտ ներկայացրեց Հայաստանում առկա բիզնես մթնոլորտը, Հայաստանի արտահանման և ներմուծման ցուցանիշները և հիմնական ոլորտները, ներդրումների խրախուսմանն ուղղված պետության հարկային և մաքսային քաղաքականությունը, ինչպես նաև Հայաստանում ստեղծվող ազատ առևտրի գոտիների ազդեցությունը բիզնեսի զարգացման վրա:
Միջոցառմանը նաև ելույթներով հանդես է եկել Հայաստանում արդեն իսկ հաջողությամբ գործող իտալական երեք ընկերությունների ներկայացուցիչներ:
Համաժողովի ընթացքում հայտարարվել է Հռոմում Իտալա-հայկական Առևտրային պալատ հիմնելու գործընթացի մեկնարկի մասին:
Միջոցառման ինստիտուցիոնալ մասի ավարտին նախարար Դավթյանը և դեսպան Կարապետյանը պատասխանել են իտալական ընկերությունների ներկայացուցիչների հարցերին:
Այնուհետև տեղի է ունեցել համաժողովի գործնական մասը, որի ընթացքում հայաստանցի և իտալացի գործարարները հնարավորություն ունեցան անմիջական շփումների միջոցով քննարկել միմյանց միջև համագործակցության հնարավորությունները:
