Երեկ՝ օրը ցերեկով Կիևի Օբոլոն շրջանի «Քարավան» արևտրա-ժամանցային կենտրոնում գնորդը կրակել է անվտանգության 4 աշխատակիցների վրա: 31-ամյա Վլադիմիր Բուրչակը, 28-ամյա Դմիտրի Մարչենկոն և 30-ամյա Ալեքսանդր Զավադսկին տեղում մահացել են, իսկ 31-ամյա Պավել Ֆեդենկովը ծանր վնասվածքներով հոսպիտալացվել է: Մարդասպանին հաջողվել է թաքնվել:
Համացանցում տարածվել են առևտրի կենտրոնի տեսահսկման խցիկների արած կադրերը, որում կասկածյալը խանութի ցուցափեղկերից գողանում է ապրանքները: Այս մասին տեղեկացնում է Rosbalt.ru-ն:
Ուկրաինայի ոստիկանությանն արդեն հաջողվել է բացահայտել հանցագործի ինքնությունը: Հայտնի է նրա ազգանունը (սակայն չի նշվում), նաև այն, որ նա Կիևի բնակիչ է, ծնվել է 1986 թվականին:
Մարդասպանը, լրագրողների տեղեկություններով, բազմաթիվ հետքեր է թողել և նման չէ պրոֆեսիոնալ մարդասպանի: Նրան բացահայտ ֆիքսել են բազմաթիվ տեսախցիկներ, նա թողել է նաև մատնահետքեր: Բացի այդ, հիպերմարկետում է մնացել նրա գլխարկը: Այն ուղարկվել է փորձաքննության:
