Բելառուս ընդդիմադիր Սերգեյ Կովալենկոն, որին իրավապաշտպանները քաղբանտարկյալ են համարում, ազատ է արձալվել բանտից: Այս մասին հաղորդում է Interfax-ը՝ վկայակոչելով բելառուսական ԶԼՄ-ներին:
Այս պահին Կովալենկոն կնոջ հետ գտնվում է իր մոր մոտ:
2010 թ. հունվարին Կովալենկոն Վիտեբսկում ամանորյա եղևնու տակ կանգնեցրել էր սպիտակ-կարմիր-սպիտակ դրոշ, ինչի համար մեղադրվել է հասարակական կարգը խախտող դիտավորյալ գործողությունների և իրավապահներին դիմադրություն ցույց տալու մեջ:
2011 թ. դեկտեմբերին ընդդիմադիրը ձերբակալվեց և մեղադրվեց պատիժը կրելուց խոսափելու մեջ՝ դատապարտվելով 2 տարվա ազատազրկման: Ձերբակալությունից հետո Կովալենկոն հացադուլ հայտարարեց, որը շարունակվեց մոտ 2 ամիս:
Այս տարվա հունիսին հայտնի դարձավ, որ Կովալենկոն ներում է խնդրել երկրի նախագահ Ալեքսանդր Լուկաշենկոյից: Կիրակի օրը նախագահը լրագրողներին հաստատեց, որ նման նամակ է ստացել երկու մարդուց: Ավելի ուշ պարզվեց, որ դրանցից մեկը գրել է Կովալենկոն:
Եվրախորհրդարանը մարտին բանաձև ընդունեց՝ պահանջելով 2014 թ. հոկեյի առաջնությունը տեղափոխել Բելառուսից՝ այդ երկրում պահվող քաղբանտարյալների պատճառով: Ցուցակում հիշատակվող քաղբանտարկյալներից մեկը Սերգեյ Կովալենկոն էր:
