Այսօր լրագրողների հետ հանդիպման ժամանակ ԱԺ ՀՀԿ-ական պատգամավոր Սուքիաս Ավետիսյանը և ՀՀՇ վարչության անդամ Հովհաննես Իգիթյանն անդրադարձան շաբաթ օրը ՀՀ նախագահ Սերժ Սարգսյանի հրավիրած արտակարգ խորհրդակցությանը:
ՀՀԿ-ական պատգամավորը նշեց, որ նախագահը խորհրդակցությունը բերեց բաց, հրապարակավ խոսակցության, ասաց, որ կան թերություններ, որոնք շտկել է պետք:
ՀԱԿ ներկայացուցիչն ասաց, որ ցանկություն ունի հավատալու Սերժ Սարգսյանի անկեղծությանը: Ըստ նրա՝ Սարգսյանի վրդովմունքը, տոնը, խոսելու ձևը, վարվելակերպը ցույց են տալիս, որ նա հասել է մի կետի, որից հետո անհնար է ղեկավարել այս երկիրը:
«Ես չեմ ուզում համարել, որ դա նախընտրական քայլ էր: Թվում է, թե խոսքը պետական գնումների մասին է, այնտեղ դիմում էր Տ. Սարգսյանին, թե չորս տարի է նույն բանի մասին են խոսում: Սա ցույց է տալիս, որ փորձում է ինչ-որ բան փոխել, բայց կառավարությունը չի կարողանում անել կամ չի ցանկանում անել:
Ու՞ր է Սերժ Սարգսյանի քաղաքական թիմը, որն իրեն օգներ, ո՞ւր է այդ թիմը, որ գործում է պառլամենտում, նրանք պետք է բարձրացնեին այդ հարցը: Ցանկանում եմ նաև մեկնաբանել, թե ինչ է նշանակում պետական գնումներ, դա ՀՀ հայտարարված տենդերներն են, որոնք շահում են որոշ կազմակերպություններ և իրականացնում են բիզնեսմենների միջոցով։ Որոնք են այս կազմակերպությունները, որոնք այս տենդերները շահում են, նույն մարդիկ են, այս մարդիկ մի ֆիրմայի միջոցով են իրականացնում գնումները»,- պարզաբանեց Հ. Իգիթյանը՝ շարունակելով, որ նախագահականում նստող ցանկացած մարդ պետք է այդ հարցը լուծի: Ուստի, բանախոսի կարծիքով, այս ձևով երկիրն առաջ տանել հնարավոր չէ, խոսքը բացահայտ կոռուպցիայի մասին է:
Նա հիշեցրեց, որ անընդհատ ասել է՝ եթե նախագահ ընտրվելը կապում ես այս կամ այն մարդու հետ, նրանք ձայն են առնում, նրանց պետական թիմ ես դարձնում, դու պրոբլեմ կունենաս:
«Նրանք ասում են, որ հինգ-տասը միլիոն են ծախսել ձայն գնելու վրա, բայց նորից գումար պետք է ծախսեն. պետությունն այս կերպ ղեկավարել հնարավոր չէ:
Բյուջեն կիսով չափ թալանվում է «ատկատներով», տեսնում ենք, որ բարձրաստիճաններն ինչպես են հարստանում: Մենք չենք կարող ստուգել, դա իրավունք ունեն անել միայն պատգամավորները: Երբ հարցնում ենք՝ ինչքան ձեթ են առնում և ինչ գնով, ինչ որակով, մեզ ասում են, թե դա գաղտնիք է: Եթե այսպես անցնի, խոշոր գլուխներին չբռնեն, մենք կտեսնենք, թե ինչ է կատարվում»,- ասաց բանախոսը՝ շարունակելով, որ չի կարծում, թե ամենամեծ գլուխը Սերժ Սագսյանինն է. ամենամեծերը նրա շուրջը գտնվող մարդիկ են:
լուսանկարը՝ PanARMENIAN Photo-ի
