«Դեռևս անցյալ տարի ասել եմ, որ հերթական ընտրություններից հետո մեծանում է արտագաղթը, քանի որ դրանք կանխորոշված են: Ընտրություններից առաջ մարդկանց հույսեր են տալիս, հետո այդ հույսերը չեն իրագործվում, հիասթափությունն է մեծանում և մարդիկ էլ ավելի են արտագաղթում»,- «Առաջին լրատվական»-ի հետ զրույցում ասաց կառավարման փորձագետ Հարություն Մեսրոպյանը:
Նա հաստատեց իր ասածը՝ նշելով, որ նախագահական ընտրություններից հետո արտագաղթը էլ ավելի կշատանա. «Մարդիկ հասկանում են, որ փոփոխություն չի լինում, իսկ եթե փոփոխություն չի լինում, նշանակում է՝ հույսն էլ է մեռնում, եթե հույսն էլ է մեռնում, մարդ արարածը միշտ ուզում է փախչել այդտեղից»:
Փորձագետի կարծիքով՝ Հայաստանում քաղաքական դաշտ գոյություն չունի, չկա ընդդիմություն, իսկ ներկայիս քաղաքական գործիչները, որոնք ակտիվ են եղել 91 թվականից, և նրանք, ովքեր նոր են մտել քաղաքական դաշտ, վտանգավոր են երկրի համար. «Իրենք կամա թե ակամա աշխատում են արտագաղթի ավելացման ուղղությամբ: Ուղղակի առաջին իշխանությունից մնացած քաղաքական գործիչները նաև ունեն բարդույթներ: Այն ամենը, ինչ այսօր տեսնում ենք, սկսվել է անկախության առաջին օրից: Մենք պետք է փորձենք դուրս գալ այս շրջանակից»:
Հարություն Մեսրոպյանն ասաց, որ ցանկացած հասարակության մեջ կան մարդիկ, որոնց կարելի է բնութագրել երեք բառով՝ պատրաստ են, կարող են, ուզում են: Այդ մարդիկ վաղ թե ուշ սկսում են բյուրեղացվել, ինքնակազմակերպվել: Այդպիսիները այս տարվանից երևում են նաև մեր հասարակության մեջ. «Ինչ-որ փուլից հետո իրենք դառնում են բավականին զգալի գործոն և այն մարդիկ, որոնք կիսահույս են կամ ինչ-որ բանի են սպասում, կամաց-կամաց հավաքվում են այդ մարդկանց շուրջ: Երկրում սկսում են սկզբից դանդաղ, հետո՝ ավելի արագ փոփոխությունները»:
Չնայած սրան, պրն Մեսրոպյանն ասաց, որ արտագաղթի տեմպերը մեզանում կբարձրանան. «Թվում է, որ 91 թվականից, երբ ունեցանք անկախություն, այդ պրոցեսին տեր պիտի լինեինք, սակայն այդպես չեղավ և հստակ կարող ենք ասել, որ մենք չունենք ազգային պետություն»:
Վերջին 10 տարվա ընթացքում լիբանանահայությունը կրճատվել է 5 անգամ, իրանահայությունը՝ 2, սիրիահայությունը՝ 2-3 անգամ: Ըստ մասնագետի՝ Հայաստանի բարձրավանդակում, այն է՝ ՀՀ, Արցախ, Ջավախք, 2 անգամ. «Սա նշանակում է Արևելքի տարածաշրջանից և մեր լեռնաշխարհից հայկական տարրը քիչ-քիչ դուրս է մղվում»:
