ԱՄՆ Դեմոկրատական կուսակցությունն իր քաղաքական ծրագրից հանել է Երուսաղեմն Իսրայելի մայրաքաղաք ճանաչելու կետը: Այս մասին, ինչպես հաղորդում է Associated Press-ը, սեպտեմբերի 4-ին հայտարարել է Դեմոկրատական կուսակցության ներկայացուցիչ Մելանի Ռոսելը՝ Հյուսիսային Կարոլինայի Շարլոտ քաղաքում Դեմոկրատական կուսակցության եռօրա համագումարի բացմանը: Ընդ որում, ավելի վաղ դեմոկրատները հայտարարել էին, որ «Երուսաղեմը եղել է և կմնա Իսրայելի մայրաքաղաք»:
Դեմոկրատների հայտարարությունը քննադատության տեղիք է տվել ԱՄՆ հանրապետական թեկնածու Միթ Ռոմնիի կողմից, որն ավելի վաղ Երուսաղեմն անվանել էր Իսրայելի մայրաքաղաք՝ դրանով պաշտպանելով Իսրայելի իշխանությունների դիրքորոշումը: Այսպես, Ռոմնին, դեմոկրատների որոշումն անվանել է «Երուսաղեմը Իսրայելի մայրաքաղաք ճանաչելու հարցից ամոթալի հրաժարում»:
Երկրների մեծամասնությունը պաշտոնապես Երուսաղեմը չեն ճանաչում որպես Իսրայելի մայրաքաղաք՝ կապված Արևելյան Երուսաղեմի շուրջ հակամարտության հետ, որը Իսրայելը բռնազավթել է 1967 թ. վեցօրյա պատերազմի ժամանակ: Պաղեստինցիները քաղաքի այդ հատվածը համարում են իրենցը և պահանջում վերադարձնել այն, մինչդեռ Իսրայելը Երուսաղեմի համարում է պետության «միասնական և անբաժան» մայրաքաղաքը: Միջազգային հանրությունը Իսրայելի մայրաքաղաք է համարում Թել Ավիվը:
Դեմոկրատական կուսակցության նոր քաղաքական ծրագիրը ներկայացվել է սեպտեմբերի 4-ին: Ծրագիրն աջակցում է միջին խավի համար հարկերի բարձրացմանը և առողջապահության ոլորտի բարեփոխմանը, ինչպես նաև առաջարկում է հրաժարվել աբորտների դեմ պայքարից և աջակցել միասեռ ամուսնություններին: Ծրագրի արտաքին քաղաքական հատվածն ուղղված է միջուկային սպառազինության կրճատմանը, Իսրայելին աջակցելուն և Իրանի կողմից միջուկային զենքի ստացումը կանխելուն:
