«Ռամիլ Սաֆարովի ռեստորան Հանցաքար», «Պատժել հայկական ռամիլսաֆարովներին», «Չե՞ս պատժում Նեմեցին: Ստանում ես Ռամիլ Սաֆարով» պաստառներով տասնյակ քաղաքացիներ իրենց բողոքի ձայնն են բարձրացնում հայոց բանակի ծառայողների նկատմամբ իրականացվող ոճրագործությունների դեմ:
«Հարսնաքար» ռեստորանային համալիրի մոտ կայացավ «Վահե Ավետյան» հասարակական շարժման նախաձեռնող խմբի կազմակերպած պիկետը՝ նվիրված Նեմեց-Սաֆարով զույգին:
«Վահե Ավետյան» հասարակական շարժման նախաձեռնող խմբի անդամ, քաղաքացիական ակտիվստ Գարեգին Չուքասզյանը տեղեկացրեց, որ նախաձեռնության ծրագրում կար պիկետների, ակցիաների շարք, որոնցից մեկն այս պիկետն է: Ըստ նրա՝ այս պիկետի նպատակն է ևս մեկ անգամ շեշտադրել, որ պետք է բացառել հարսանեկան և այլ ուրախության արարողությունների կազմակերպումը «Հարսնաքար» ռեստորանային համալիրում: «Մեր նպատակը հասարակությանը զգոնացնելն է, Վահե Ավետյանի և Գուրգեն Մարգարյանի սպանություններից հետո զուգահեռն այն է, որ երկու դեպքում էլ կա արդարադատության պահանջ»,- ասաց Գարեգին Չուքասզյանը:
«Առաջին լրատվական»-ի հետ զրույցում ՀԱԿ ատիվիստ Վարդգես Գասպարին նշեց, որ իր համար Վահե Ավետյանի սպանությունը շատ ավելի ցավալի է, քան Գուրգեն Մարգարյանի սպանությունը, քանի որ Վահե Ավետյանին սպանեցին իր հայրենակիցները, իսկ Գուրգեն Մարգարյանին՝ թշնամի պետության ներկայացուցիչը: « Վահե Ավետյանի մահը շատ ավելի դաժան էր»,- ընդգծեց Վարդգես Գասպարին:
Հիշեցնենք, որ երեկ Հունգարիայի կառավարությունն Ադրբեջանին տարհանձնեց Հունգարիայում ցմահ ազատազրկման դատապարտված Ռամիլ Սաֆարովին, ով ութ տարի առաջ դաժանորեն սպանել էր հայ սպա Գուրգեն Մարգարյանին: Անմիջապես Ադրբեջանում նախագահի կողմից Սաֆարովին ներում էր շնորհվել, իսկ այսօր՝ մայորի կոչում շնորհվել: Հիշեցնենք նաև, որ ամիսներ առաջ «Հարսնաքար» ռեստորանային համալիրում Ռուբեն Հայրապետյանի թիկնազորի անդամների կողմից դաժան ծեծի ենթարկվելու արդյունքում մահացել էր հայոց բանակի սպա, ռազմական բժիշկ Վահե Ավետյանը:
