ՀՀ-ում Սիրիայի դեսպանության խորհրդական Մոհամադ Հոսամ Հաֆեզն այսօր աշխատանքի չի ներկայացել, ինչը, փաստորեն, անուղղակիորեն հավաստում է լրատվամիջոցներում տարածված այն տեղեկությունը, թե նա լքում է Սիրիայի նախագահ Բաշար Ասադի կառավարությունը և անցնում է ընդդիմության շարքերը: «Առաջին լրատվական»-ի հետ զրույցում այս մասին տեղեկացրեցին Հայաստանում Սիրիայի դեսպանատան մամուլի ծառայությունից:
Այնտեղից նաև հայտնեցին, որ ավելին առայժմ չեն կարող ասել, սակայն դեսպանության խորհրդականի՝ աշխատանքի չներկայանալն արդեն իսկ նշան է, որ նրա՝ ընդդիմության շարքերն անցնելու մասին լուրերը համապատասխանում են իրականությանը:
Հիշեցնենք, որ կիրակի օրը «Լիբանանի ձայն» ռադիոկայանը հաղորդել էր, որ Հայաստանի Հանրապետությունում Սիրիայի արաբական հանրապետության դեսպանության խորհրդականը հրաժարվել է պաշտոնից:
Բացի այդ, Սիրիայի ընդդիմադիր ուժերից մեկի Twitter-ի պաշտոնական կայքէջից տեղեկանում ենք, որ Մոհամադ Հոսամը հրաժարական է տվել` հայտնելով որ լքում է Սիրիայի նախագահ Բաշար Ասադի կառավարությունը և անցնում է ընդդիմության շարքերը:
Հիշեցնենք, ավելի վաղ ընդդիմության կողմն էին անցել Բաղդադում, Կիպրոսում և ԱՄԷ-ում Սիրիայի դեսպանները:
