Apple ընկերության եկամուտը 2012 թվականի երկրորդ եռամսյակի տվյալներով` կազմել է 35 միլիարդ դոլար: Այս մասին ասված է կորպորացիայի կայքում:
Վերլուծաբանները կանխատեսում էին, որ այդ ցուցանիշը կկազմի 37,5 միլիարդ դոլար: Եռամսյակային ֆինանսական տվյալների հրապարակումից հետո ընկերության արժեթղթերի գինը Նյու Յորքի բորսայում ընկել է 5 տոկոսով (29,82 դոլարով)` մեկ բաժնետոմսի դիմաց կազմելով 571,10 դոլար:
Ընկերության արտադրանքի գինը 2012-ի երկրորդ եռամսյակում ընկել է` հասնելով 2010 թվականի ցուցանիշին: 2 տարի առաջ iPhone 4-ն արժեր 600 դոլար, 2011-ի կեսերին դրա գինը հասավ 1000 դոլարի, սակայն կրկին այն կարելի է խանութներից ձեռք բերել 600-650 դոլարով:
Itar-Tass-ի փոխանցմամբ` ապրիլ-հունիս ամիսներին Apple ընկերությունը վաճառել է 17 միլիոն iPad պլանշետային համակարգիչ, որը գերազանցել է ամենախիզախ կանխատեսումները, և 26 միլիոն iPhone սմարթֆոն:
