Հոնգկոնգում ավելի քան 100 մարդ վնասվածքներ են ստացել, որի պատճառը խաղաղօվկիանոսյան հզոր «Վիսենտե» թայֆունն է: Քաղաքում քամու ուժգնությունը հասել է 140 կմ/ժամի: Այն ուղեկցվել է անձրևներով: Ամբողջ գիշեր մեգապոլիսը բնության տարերքի իշխանության ներքո է եղել, որտեղ 1999 թվականից առաջին անգամ տրվել է փոթորկի նախազգուշացման ամենաբարձր ազդանշանը` թիվ 10-ը: Այս մասին հաղորդում է Itar-Tass-ը:
Այսօր առավոտյան աստղադիտարանը ազդանշանն իջեցրել է 8 բալի: Սակայն քաղաքում շարունակում են փակ մնալ բանկերը, կառավարական հաստատությունները, մանկապարտեզները և այլն: Այսօր առավոտյան չի բացվել նաև հոնգկոնգյան ֆոնդային բորսան: Քաղաքային ծառայությունները փողոցներից հավաքում են տապալված ծառերը, կոտրված անձրևանոցները, աղբը և փոթորկի հետևանքով կոտրված գովազդային վահանակները: Բուժօգնության է դիմել 118 բնակիչ:
Ալեկոծության պատճառով դադարեցվել է ծովային հաղորդակցությունը: «Չեկ Լապ Կոկ» միջազգային օդանավակայանում չեղյալ է հայտարարվել և հետաձգվել ընդհանուր առմամբ 270 չվերթ:
Ներկայում թայֆունը աստիճանաբար լքում է Հոնգկոնգը: Թուլացնելով ուժը` այն շարժվում է դեպի հյուսիս-արևմուտք:
