«Ուզում եմ կրկին զգուշացնել Պետրոսին ու բոլոր լրագրողներին, որ ես Մազ եմ իմ բոլոր ընկերների համար, պետրոսների համար ես պարոն Մազմանյան եմ կամ Արմեն Աղասիչ, կամ գոնե ինստիտուտի ռեկտոր»,- այս մասին այսօր ասուլիսի ընթացքում ասաց Երևանի թատրոնի և կինոյի պետական ինստիտուտի ռեկտոր Արմեն Մազմանյանը:
Խոսքը վերաբերում է Պետրոս Ղազարյանի հայտարարությանը. Արմեն Մազմանյանին Մազ էր անվանել և վրդովվել, որ նա չի մասնակցել «Հարսնաքարի» առնչությամբ որևէ հասարակական նախաձեռնության և որևէ կարծիք չի արտահայտել. «Եթե ինքը որոշել է պիտակներով խոսել, ուզում եմ իրեն իր ձևով պատասխանել. Ա՛յ գնդլիկ բոքոնիկ Պետրոս, մե՛կ Կենտրոնամետ ես գլորվում, մե՛կ իշխանամետ, էդ ինչի՞ ակտիվ չէիր Կենտրոնով, երբ որ քո կերակրող համակարգում թիկնապահներն իրար վրա կրակել ու մարդ էին «ջարդել»: Բա ինչո՞ւ էդ ժամանակ հասարակական ակտիվ քաղաքացիական կեցվածքդ չէիր արտահայտում. վախենում էիր, որովհետև հացդ չէին տա: Երբ որ ինքներդ մի վեց անգամ կաշի եք ծախել, խնդրում եմ ուրիշներին ձեր արշինով մի՛ չափեք»:
Ինչ վերաբերում է «Հարսնաքարին», Արմեն Մազմանյանն ասաց, որ տեղի ունեցածը ուղղակի մարդկային ուղեղի ու բարոյականության մեջ չի տեղավորվում, սա ո՛չ կուսակցական խնդիր է, ո՛չ իշխանական, սա ազգային գենետիկ ընդերքում առաջացած խախտման արդյունք է: Նրա մեկնաբանությամբ՝ նոր սոցիալական խավ է ստեղծվել, որը միայն իշխանամետ չէ. «Նույն ընդդիմադիրները վեց հատ բուլդոկ հետևներից գցած՝ չեն քայլո՞ւմ: Դրանց պետք է օրենքով ոչնչացնել, ճզմել, մինչև վերջին մարդը, ով կապ ուներ «Հարսնաքարի» հետ, պետք է դատվեր, որ վերջապես այս անպատժելիության մթնոլորտը վերանա: Ես նայում եմ էդ ախրանիկների բոյին ու բիլակին, նայում եմ բժիշկներին, ֆիզիկական կշիռն այնքա՜ն տարբեր է. էդ ի՞նչ անասնական մոլուցք է եղել…»:
Նրա կարծիքով՝ Ռուբեն Հայրապետյանի երկու թերթ մեղայականում մի բան գոնե համոզիչ էր, որ ինքն անձամբ ապրելու է դրա հետ մինչև կյանքի վերջ. «Այո՛, ինքն այնտեղ չի եղել, բայց դա եղել է իր ստեղծած միջավայրում: Ես չեմ կարծում, որ ինքն իրեն լավ է զգում, ես չեմ կարծում, որ սա այն դեպքն է, որ կմարսվի, որովհետև բոլորն էլ տեսնում են թե՛ հասարակական ակտիվությունը, թե՛ ժողովրդի վրդովմունքը»:
