ԱՄՆ առաջիկա նախագահական ընտրությունների թիվ մեկ թեկնածուի` հանրապետական Միթ Ռոմնիի ելույթը երեկ հարուցել է աֆրոամերիկացիների բուռն դժգոհությունը, որոնք սուլել են նրա ելույթից առաջ։ Հավաքվածները սկսել են նման կերպ արտահայտել իրենց դժգոհությունը, երբ Ռոմնին հայտարարել է` եթե ընտրվի նախագահ, ապա չեղյալ կհայտարարի առողջապահական բարեփոխումները, որոնք առաջարկել է ներկայիս նախագահ Բարաք Օբաման։ Այս մասին հաղորդում է Interfax գործակալությունը։
«Ես պատրաստվում եմ չեղյալ հայտարարել բոլոր թանկ և անպետք ծրագրերը, այդ թվում՝ առողջապահական բարեփոխումների ծրագիրը»,- ասել է Ռոմնին սևամորթ բնակչության հետ հանդիպման ժամանակ, որը կազմակերպվել էր Հյուսթոնում։ Սևամորթները կրկին սուլել են, երբ Ռոմնին ասել է` Օբաման խոստացել էր նոր աշխատատեղեր, սակայն չի կարողացել իրականացնել խոստումը։