Այս տարվա ապրիլին ՀՀ կառավարությունը և «Սիտրոնիկս Արմենիա» ընկերությունը կնքել էին պայմանագիր «ՌԱՕ ՄԱՐՍ» և «ԵրՄՄԳՀԻ» ընկերությունների տարածքներում ստեղծված ազատ տնտեսական գոտու կազմակերպման մասին: Ինչպես «Առաջին լրատվական»-ին հայտնեց «Սիտրոնիկս Արմենիա»-ի գլխավոր տնօրեն Արմեն Խաչատրյանը, ներկայում գործարանի տարածքում նախապատրաստական աշխատանքներ են կատարվում, պատվիրվել է տարածքի կահավորման համար անհրաժեշտ տեխնիկան:
«Բավականին սարքավորումներ ենք պատվիրել՝ տեսախցիկներ, անվտանգության սարքեր, հրշեջ և այլն, և սպասում ենք, որ արտասահմանից առաքեն, մոտ 1-1.5 ամսից կհասնի: Պետք է տեխնիկայով հագեցնենք ազատ տնտեսական գոտու տարածքը, այդ թվում՝ բարձիչ կռունկներ, փոխադրող մեքենաներ և այլն»,- ասաց Ա. Խաչատրյանը և նշեց, որ նախապատրաստական աշխատանքների համար ժամկետը սահմանվել է մինչև հոկտեմբեր և հույս հայտնեց, որ մինչ այդ կավարտեն: Նա նշեց, որ այս փուլում ներդրումների ծավալը կկազմի մոտ 5 մլն դոլար:
Հարցին՝ թե դեպի գործարան տանող ճանապարհները կարգի բերելու համար ի՞նչ է արվում, Ա. Խաչատրյանը պատասխանեց, որ դա իրենց պատասխանատվության տակ չէ, այլ՝ քաղաքային իշխանությունների, որոնք պետք է կարգի բերեն ճանապարհները. «Ինչ-որ բան արվում է, մեր կողմից էլ փոքր ասֆալտապատման աշխատանքներ են արվում, բայց այդ ճանապարհը լայնացնել հնարավոր չէ, որովհետև կողքերից շենքեր են, բնակելի տներ, և հնարավոր չէ»:
Նշենք, որ «ՌԱՕ ՄԱՐՍ»-ի տարածքում ձևավորվելիք ազատ տնտեսական գոտին մասնագիտացած է լինելու արտադրաարդյունաբերական և տեխնիկակիրառական էլեկտրոնիկայի, ճշգրիտ ինժեներիայի, դեղագործության և բիոտեխնոլոգիայի, տեղեկատվական տեխնոլոգիաների, այլընտրանքային էներգետիկայի, արտադրական դիզայնի և հեռահաղորդակցության ոլորտներում, իսկ «ԵրՄՄԳՀԻ» ՓԲԸ տարածքը` վերոնշյալ ոլորտները սպասարկող գիտական հետազոտություններ և մշակումներ, փորձարարակոնստրուկտորական աշխատանքներ իրականացնելու ուղղությամբ:
