Պետության կարիքների համար վերջին շրջանում Երևան քաղաքում բազմաթիվ տներ քանդվեցին, այդ թվում նաև Փ.Բուզանդ փողոցի տները, էլիտար բնակելի շենքներ կառուցելու համար: Այդ տներից մի քանիսն էլ համարակալվեցին հին Երևանը վերակառուցելու համար:
«Առաջին լրատվականի» ֆոտոխցիկը ֆիքսել է, թե ինչ վիճակում են գտնվում այդ տները և համարակալած քարերը, որոնք պետք է պահպանվեն հետագայում օգտագործվելու համար: Առաջին հայացքից թվում է, թե քարերը շատ լավ վիճակում են և չեն վնասվել, բայց մի փոքր մոտենալուց հետո հասկանում ես, որ ամեն ինչ այնքան էլ «վարդագույն» չէ, քարերից շատերը վայրենաբար վնասված են և երևի արդեն ոչ պիտանի:
«Առաջին լրատվականը» փորձեց Երևանի նախկին գլխավոր ճարտարապետ Սամվել Դանիելյանից պարզել, թե այդ որոշումը կայացնելուց հետո հետևո՞ւմ է հին Երևան կառուցելու աշխատանքներին, նա ի պատասխան ասաց. «Այդ հատվածը պետության կարիքների համար անհրաժեշտ գոտի է ճանաչվել: Ես հիմա չեմ ցանկանում խոսել և որևէ բան ասել, ես պարզապես ուզում եմ հանգստանալ»:
Թողնենք նախկին ճարտարապետը հանգստանա բազմաչարչար աշխատանքներ կատարելուց և պարզենք, թե ներկայիս ճարտարապետ Միքայել Հասրաթյանը ի՞նչ կարծիք ունի այս որոշման վերաբերյալ և արդյոք գիտի՞, թե ինչպես են ընթանում հին Երևան կառուցելու աշխատանքները:
Քաղաքապետարանի հասարակայնության հետ կապերի բաժնից մեզ տեղեկացրին, որ Միքայել Հասրաթյանը բանավոր չի կարող պատասխանել և միայն մեր հարցումից հետո օրենքով սահմանված կարգով 5 օրվա ընթացքում կարող ենք ստանալ մեզ հուզող հարցերի պատասխանը:
Մեզ մնում է միայն սպասել և հուսալ, որ հարցումը չի անտեսվի, և մենք կստանանք մեզ հուզող բոլոր հարցերի պատասխանները, իսկ քարերը կմնան նույն տեղում և ավելի չեն վնասվի:
