ՀՀ Գրողների միության նախագահ Լևոն Անանյանն այսօր լրագրողների հետ հանդիպմանն ասաց, որ Թիֆլիսի Թումանյանի բնակարանի հարցը վերջնականապես լուծված է. «Անցել է շուրջ 5-6 ամիս, հարցը լուծվել է՝ շնորհիվ կազմակերպիչների հետևողական աշխատանքի»:
Պրն Անանյանը նշեց, որ բնակարանի բարերարը Գյումրու քաղաքապետ Վարդան Ղուկասյանն է, և շնորհակալություն հայտնեց նրան և ընդհանրապես Ղուկասյանների ընտանիքին իրենց աջակցելու համար. «Այժմ մենք անցնելու ենք հաջորդ փուլին. Թումանյանի թիֆլիսյան բնակարանը ներկայացնելու ենք նորովի: Բնակարանը կնվիրաբերենք Վիրահայոց թեմին, որն էլ հետագայում կզբաղվի մեր հարևան երկրում հայկական այս օջախի զարգացմամբ»:
Լևոն Անանյանը բնակարանի բանալիները հանձնեց Վիրահայոց թեմի առաջնորդ Վազգեն եպիսկոպոս Միրզախանյանին՝ նշելով, որ սա պատմական պահ է, քանի որ վերջապես բնակարանը օրինավոր տերերինն է:
Վազգեն եպիսկոպոս Միրզախանյանի խոսքով՝ այժմ տարվում են աշխատանքներ բնակարանի մյուս մասը ևս վերցնելու համար.«Բնակարանի մյուս կեսը Թումանյանի ծոռնուհունն է, հենց այնտեղ է գտնվում բուն պատմամշակութային հատվածը: Հիմա բանակցություններ ենք տանում, որպեսզի բնակարանն ամբողջությամբ ներկայացվի որպես թանգարան»:
Նրա հավաստմամբ՝ բնակարանը կդառնա հին Վերնատան ժառանգորդը. «Օր օրի Թիֆլիսում վերանում է հայկականը. հուսով եմ՝ Թումանյանի տուն-թանգարանը կդառնա հայ երիտասարդներին կապող օղակ»:
Ինչպես նշեց Վազգեն եպիսկոպոս Միրզախանյանը՝ այսօր Վրաստանում կարողացել են հասնել նրան, որ տարբեր հայկական պատմամշակութային արժեքներ, որոնք գործում կամ չեն գործում, այլևս վիճելի չեն վրացիների համար. նրանք իրենց նյութերում դրանք ներկայացնում են որպես հայկական: