Հայաստանում ռուսական ռազմաբազայի պայմանագրային զինծառայողների թիվը մինչև տարեվերջ կրկնապատկելու որոշումը անհանգստություն կառաջացնի ոչ միայն Վրաստանում, այլ նաև ամբողջ տարածաշրջանում, քանի որ Հարավային Կովկասի անվտանգության համար դա շատ մեծ վտանգ է ներկայացնում: «Առաջին լրատվական»-ի հետ զրույցում նման տեսակետ հայտնեց Վրաստանի նախագահի ազգային փոքրամասնությունների հարցերով խորհրդական Վան Բայբուրդը:
Հարցին՝ ինչո՞ւ պետք է հատկապես Վրաստանն անհանգստանա Ռուսաստանի նման որոշումից, նա խնդրեց իրեն նման հարցեր չուղղել՝ ավելացնելով. «Լավ է՝ ես ձեռնպահ լինեմ, այլապես ինձ համար շատ վտանգավոր բաներ եմ ասելու: Այս թեմայով, խնդրում եմ, ինձ մի՛ խոսեցրեք: Այնպիսի թեմա է, որ շատ անհարմար եմ զգում»:
Վան Բայբուրդի կարծիքով՝ միանշանակ չէ՝ Հայաստանը երբեք թույլ չի՞ տա, որ իր տարածքում տեղակայված Ռուսաստանի ռազմակայանից Վրաստանին սպառնալիք ներկայացվի. «Հարյուր տոկոսով ոչ ոք երաշխիք չի տա: Միայն կարող եմ ասել, որ յուրաքանչյուր արտասահմանյան ռազմակայան սպառնալիք է տարածաշրջանի համար»:
Հիշեցնենք, որ Հայաստանի ռուսական ռազմակայանի պայմանագրային զինծառայողների թիվը մինչև ընթացիկ տարվա ավարտը կկրկնապատկվի: Այս մասին օրերս լրագրողների հետ հանդիպման ժամանակ հայտնել է Ռուսաստանի Հարավային ռազմական օկրուգի մամուլի ծառայության ղեկավար Իգոր Գորբուլը: