Եվրոպական կարգավորողները պնդում են, որ Կիպրոսը պետք է օգտագործի օգնության ամբողջական փաթեթը 10 մլրդ եվրոյի չափով՝ չնայած երկիրը փորձում է սահմանափակել իր բանկային համակարգին տրվող աջակցությունը: Այս մասին հաղորդում է Bloomberg գործակալությունը՝ վկայակոչելով իրադրությանը մոտ կանգնած աղբյուրներին:
Կիպրոսն առայժմ արտաքին օգնության խնդրանքով չի դիմել, սակայն նա կարող է դառնալ եվրոգոտու 17 երկրներից 5-րդը, որը նման օգնության կարիք կունենա: ԵՄ ներկայացուցիչները նշում են, որ Կիպրոսը փորձում է սահմանափակել բանկային սեկտորին տրվող օգնությունը, որպեսզի խուսափի վերահսկողությունից, որը պահանջվեց Հունաստանի, Իռլանդիայի և Պորտուգալիայի դեպքում:
Հունաստանի ճգնաժամի սրման պայմաններում այս տարվա գարնանը կիպրոսյան բանկերը զգալի ծանրաբեռնվածության տակ են ընկել, իսկ կառավարությունը սկսել է խոշոր ֆինանսական կառույցների ռեկապիտալիզացիայի գործընթաց: «Սակայն, ինչպես սովորաբար լինում է, սեփական գումարները չեն բավականացրել, և Կիպրոսն այժմ սպասում է դրսից օգնության»,- մեկնաբանում է Imterfax-ի փորձագետը:
Նրա խոսքերով՝ այս պահին Կիպրոսի բանկային համակարգում իրավիճակը ավելի չեզոք է, քան Հունաստանում կամ Իսպանիայում, սակայն նոր միջոցները կբարելավեն այդ համակարգը:
