Մայրաքաղաքի 2011թ.-ի սոցիալ-տնտեսական զարգացման, ինչպես նաև ընթացիկ ծրագրերին առնչվող հարցեր քննարկվեցին հերթական աշխատանքային խորհրդակցության ընթացքում, որը վարում էր Երևանի քաղաքապետի առաջին տեղակալ Տարոն Մարգարյանը: Անդրադառնալով հասարակական տրանսպորտի կանգառներում կարգ ու կանոն հաստատելու և տրանսպորտային միջոցների կուտակումները բացառելու հարցին, քաղաքապետի առաջին տեղակալն ընդգծեց, որ այդ ուղղությամբ տարվող աշխատանքները պետք է լինեն շարունակական. «Պետք է հետևողական լինենք, որպեսզի հասարակական տրանսպորտի կանգառներում բացառվի այլ մեքենաների կայանումը և ուղևորատար տրանսպորտի համար ապահովվի անխափան երթևեկություն»,-նշեց նա:
Զեկուցվեց, որ Ճանապարհային ոստիկանության հետ համատեղ ուսումնասիրվել և ճանապարհային տեսախցիկներ տեղադրելու նպատակով առանձնացվել է 15 ծանրաբեռնված խաչմերուկ:
Մայրաքաղաքի ավտոկայանատեղիների գույքագրման աշխատանքների ընթացքի հետ կապված նշվեց, որ զուգահեռ ուսումնասիրվում է դրանց տարողունակությունը, կայանող տրանսպորտային միջոցներից գանձվող գումարների ընդհանուր չափը, ինչպես նաև իրավական հիմքը: Տարոն Մարգարյանը հանձնարարեց ավելի արդյունավետ աշխատել և կայանատեղիների գործարկումը բերել օրինական դաշտ.
«Այն ավտոկայանատեղիները, որոնք պայմանագրեր չունեն վարչական շրջանների հետ` արգելեք: Եթե կան ավտոկայանատեղիներ, ուրեմն պետք է լինեն պայմանգրեր»,- նշեց քաղաքապետի առաջին տեղակալը:
Անդրադառնալով բացօթյա ապօրինի առևտրի արգելման և կանխարգելման գործընթացին, քաղաքապետի առաջին տեղակալը համապատասխան կառույցների առջև խնդիր դրեց հետևողականորեն շարունակել աշխատանքը: Տարոն Մարգարյանը նշեց, որ շաբաթ և կիրակի օրերին աշխատանքային շրջայցի ընթացքում ծանոթացել է մայրաքաղաքի մի շարք շուկաների պայմաններին և որոշ բացթողումների մասով տվել առանձին հանձնարարականներ: Քաղաքապետի առաջին տեղակալն ավելացրեց նաև, որ մշտական հսկողություն պետք է շարունակվի սննդի և ավտոշուկաների ներսում անհրաժեշտ պայմանների և սանիտարական պատշաճ վիճակի ապահովման առումով: Հանձնարարվեց արագացնել մայրաքաղաքի որոշ հատվածներում ժամանակակից փոքրածավալ շուկաների ստեղծման ուղղությամբ տարվող ուսումնասիրությունները, որպեսզի գարնանն արդեն այդ շուկաները պատրաստ լինեն:
Անդրադառնալով Կորյունի փողոցի թիվ 21 և 21ա շենքերի միջև գտնվող անհատական տների հրդեհվելուց տուժած բնակիչների հարցին, զեկուցվեց որ քաղաքապետարանի կողմից խնդրին հիմնավոր լուծում տալու նպատակով ուսումնասիրություններ են իրականացվել և պատրաստվել է առաջարկությունների փաթեթ։
Քաղաքապետի առաջին տեղակալը վարչական շրջանների ղեկավարներին հանձնարարեց ներակայացնել համատիրություների կողմից իրականացված աշխատանքների հաշվետվություն, ինչպես նաև 2011 թ-ին նախատեսված վարչական շրջանների ընդհանուր աշխատանքների և համատիրությունների գործունեության ծրագրերը:
Երևանի քաղաքապետարան
