Եգիպտոսի նախագահական ընտրություններում իսլամիստ Մուհամմադ Մուրսիի հաղթանակը կարող է սառեցնել ներպաղեստինյան հաշտությունը՝ Գազայում վերահսկողություն իրականացնող ՀԱՄԱՍ-ի մոտ ստեղծելով այն տպավորությունը, որ իր հիմնական նպատակին՝ միջազգային մեկուսացումից դուրս գալուն, կարող է հասնել առանց Պաղեստինի ինքնավարության ղեկավար Մահմուդ Աբասին զիջումներ անելու: Այս մասին RIA Novosti-ի թղթակցին հայտնել են տեղի քաղաքական գործիչները:
Նշենք, որ Եգիպտոսը միջնորդ է հանդիսանում պաղեստինյան երկու հակամարտող ճամբարների՝ 4 տարի Գազայի հատվածը վերահսկող ՀԱՄԱՍ շարժման և ՖԱԹՀ-ի առաջնորդ Մահմուդ Աբասի միջև բանակցություններում:
Գործակալության զրուցակիցներն ասում են, որ ՀԱՄԱՍ-ը, որը ներկայանում է որպես «Մուսուլման եղբայրների» ճյուղ, Մուրսիին յուրային է համարում և հույս ունի, որ նա իշխանության գալով՝ կօգնի իրենց միջազգային ճանաչում ձեռք բերել:
«ՀԱՄԱՍ-ին ձեռնտու է Մուրսիի հաղթանակը, որը կարող է հանել Գազայի հատվածի շրջափակումը և ճանապարհ բացել խմբավորման միջազգային ճանաչման համար՝ որոշակի երաշխիքներ ստանձնելով ԱՄՆ-ի և Իսրայելի առաջ»,- ասել է պաղեստինցի քաղաքական փորձագետ Մուհսեն Աբու Ռամադանը:
Աբու Ռամադանի կարծիքի հետ համաձայն է գործակալության մեկ այլ զրուցակից՝ հայտնի քաղաքագետ Թալել Օքալը: «Մուրսիի հաղթանակը կնշանակի, որ հաշտության գործընթացը դժվարանում է: Քաղաքական իսլամիստները ավելի քիչ հակված կլինեն զիջումների: Նրանք իրենց մոտ կանգնած թեկնածուից պարգև են սպասում վերջին տարիներին ցուցաբերած հանգստության և համբերատարության համար, պարգև՝ շրջափակումը հանելու, միջազգային ճանաչման, Եգիպտոսի հետ լավ և կայուն հարաբերությունների տեսքով»,- ասել է նա:
Եգիպտոսի նախագահի մյուս թեկնածուից նախկին վարչապետ Ահմադ Շաֆիկից փորձագետներն ակնկալում են նախկին քաղաքական գծի շարունակում, որը հակված էր ավելի շուտ Աբասի պաշտպանությանը:
«Շաֆիկի օրոք Եգիպտոսը, ինչպես նախորդ իշխանությունները, կշարունակեն ճնշում գործադրել երկու կողմերի, հատկապես ՀԱՄԱՍ-ի վրա, որպեսզի ապահովեն հաշտության պայմանների իրագործումը… Նրա հաղթանակի դեպքում Աբասն իրեն ավելի ուժեղ կզգա»,- ասել է Օքալը:
Հիշեցնենք, որ մոտ մեկ տարի առաջ ՖԱԹՀ-ը և ՀԱՄԱՍ-ը Եգիպտոսի միջնորդությամբ համաձայնություն ձեռք բերեցին համատեղ նախագահական և խորհրդարանական ընտրություններ անցկացնելու և անցումային կառավարություն ձևավորելու վերաբերյալ:
