Վաղն ամբողջ հանրապետությունում տեղի կունենան բուհական ընդունելության օտար լեզուների միասնական քննությունները։ Օտար լեզուներից, որոնց ցանկում են անգլերենը, գերմաներենը, ֆրանսերենը, իսպաներենը, իտալերենը և պարսկերենը, քննություն կհանձնի 9175 դիմորդ: Այս մասին «Առաջին լրատվական»-ի հետ զրույցում տեղեկացրեց ԳԹԿ մամլո խոսնակ Գայանե Մանուկյանը: Նա հստակեցրեց, որ անգլերեն առարկայից քննություն հանձնելու դիմում-հայտ է ներկայացրել 8173, գերմաներենից՝ 521, ֆրանսերենից՝ 447, իսպաներենից՝ 25, իտալերենից՝ 4, իսկ պարսկերենից՝ 5 դիմորդ: Գայանե Մանուկյանը նաև ասաց, որ այս տարի առաջին անգամ ռուսերենը ևս դասվել է օտար լեզուների ցանկում, ավելի ճշգրիտ՝ եղել է միջանկյալ առարկա, որը դիմորդներին ազատում է կազմակերպչական հարցերի վերաբերյալ մի շարք խնդիրներից: Ըստ Գայանե Մանուկյանի՝ վաղը քննական կենտրոններ են գործելու հանրապետության բոլոր մարզերում և ԼՂՀ-ում:
Հիշեցնենք, որ բուհական ընդունելության քննությունները մեկնարկել են հունիսի մեկից, և արդեն իսկ ամփոփվել են «Աշխարհագրություն», «Կենսաբանություն», «Ընդհանուր պատմություն», «Ռուսաց լեզու» ու «Հայոց լեզու և հայ գրականություն» առարկաների միասնական քննությունների արդյունքները:
