Rosbalt.ru-ի փոխանցմամբ՝ Ստամբուլում կառուցելու են էկոլոգիապես մաքուր օկրուգ: 2011 թվականին Թուրքիայի վարչապետ Ռեջեփ Էրդողանն այդ նախագիծը ճանաչել է որպես ամենահեռանկարային:
Օկրուգը որոշվել է անվանել Ենի շեհիր (Նոր քաղաք): Նախագծի վրա աշխատում է ամերիկացի հայտնի ճարտարապետ, Urban Green Global ճարտարապետական ընկերության տնօրեն Սիդնի Պասեկը: Օկրուգը գտնվելու է սևծովյան հյուսիսային ափին: Օկրուգի կառուցման համար հատկացվել է 40,000 հեկտար տարածք:
Այն լինելու է էկոլոգիապես մաքուր տարածք: Դրա նախագծման ժամանակ հաշվի են առնվել և նվազագույնի են հասցվել շրջակա միջավայրի վրա կործանարար ազդեցություն ունեցող բոլոր գործոնները՝ էներգիայի, ջրի ու սննդամթերքի ոչ խելամիտ ծախս, ջերմության արձակում, օդի աղտոտվածություն ածխաթթու գազով ու մեթանով, ջրի աղտոտվածություն:
Օկրուգում բնակվելու է 1 միլիոն մարդ: Նոր քաղաքի կառուցումը հնարավորություն կտա ստեղծել 400,000 նոր աշխատատեղ: Օկրուգի կարևորագույն նախագծերից մեկը նոր օդանավակայանի կառուցումն է, որը կնվազեցնի Աթաթուրքի անվան օդանավակայանի ծանրաբեռնվածությունը: Նոր օդանավակայանը կդառնա աշխարհի խոշորագույն օդանավակայանը: Այստեղ ուղևորափոխադրումների տարեկան շրջանառությունը գերազանցելու է 100 միլիոնը:
