Ինչպես հաղորդում է Reuters գործակալությունը, այսօր Եգիպտոսի նախագահ Հոսնի Մուբարաքը հրաժարական է տվել իշխող Ազգային ժողովրդավարական կուսակցության նախագահի պաշտոնից: Իրենց պաշտոններն են թողել նաև կուսակցության ղեկավար ողջ մարմինը` գլխավոր քարտուղար Սաֆուաթ Ալ-Շարիֆը և կուսակցության քաղաքական կոմիտեի ղեկավար, Հոսնի Մուբարաքի որդին` Գամալ Մուբարաքը:
Իշխող կուսակցության գլխավոր քարտուղար է դարձել Ազգային ժողովրդավարական կուսակցության բարեփոխական թևի առաջնորդ, ազատական գաղափարախոսության կողմնակից Հուսամ Բադրաուին: Բացի այդ ղեկավար մարմնում տեղ են զբաղեցրել «Ալ-Ահրամ» ինֆորմացիոն հոլդինգի ղեկավար Աբդ Ալ-Մունեմ Սայիդը և ֆինանսների ներկայիս նախարար Սամիր Ռադուանը:
Այս թևը մշտապես հանդես է եկել կուսակցության բարեփոխման օգտին և կոչ է արել չեղյալ համարել երկրում 30 տարի շարունակ գործող արտակարգ դրությունը: Ընդդիմության պատասխանն այս քայլերին դեռ հայտնի չէ: Մի քանի ժամ առաջ բանակի գեներալ Հասան Ալ-Ռաուանին ժամանել էր Թահրիր հրապարակ և կոչ արել լքել այն: Բանակը նաև չէր թույլատրում ո՛չ մուտք գործել Թահրիր, ո՛չ էլ լքել այն: Սակայն այս պահին բանակից ոչ մեկ չի բանակցում ցուցարարների հետ: Վերջիններս շարունակում են իրենց բողոքի ակցիան անձրևոտ և ցուրտ եղանակային պայամններում:
