Հունվարի 26-ից փետրվարի 2-ը ընկած ժամանակահատվածում ներդրողները կտրուկ նվազեցրել են իրենց ներդրումները զարգացող երկրների արժեթղթերում: Այս մասին հաղորդում է Reuters-ը: Կապիտալի զուտ արտահոսքը նշված ֆոնդերից կազմել է 4.1 միլիարդ դոլար:
Սրա հիմնական պատճառը Եգիպտոսում տեղի ունեցող իրադարձություններն են, որոնք սպառնում են քաղաքական անկայունություն առաջացնել նաև զարգացող երկրներում:
Հանված գումարների նշանակալի մասը ուղղվել է ԱՄՆ-ի արժեթղթերի գնմանը. դրան նպաստել է բարենպաստ մակրոտնտեսական վիճակագրությունը: Մասնավորապես` հրապարակվել են 2010թ. ՀՆԱ աճի վերաբերյալ տարեկան (2.9% աճ) և 2011թ. Արդյունաբերական արտադրանքի ծավալի աճի տվյալները:
Ամենամեծ վնասը կրել են Չինաստանն ու Հնդկաստանը, որտեղից կապիտալի արտահոսքը գերազանցել է 800 մլն դոլարը: Իսկ Արևելյան Եվրոպայից ու Ռուսաստանից համեմատաբար ավելի քիչ չափով կապիտալ է արտահոսել:
Ինչպես նշում է Ведомости-ն, այս առումով Ռուսաստանի ոչ այնքան վատ ցուցանիշները կարող են պայմանավորված լինել Ռուսաստանի նկատմամբ ներդրողների հետաքրքրության որոշ աճով` որպես երկրի, որը կարող է հանդես գալ որպես էներգակիրների այլընտրանքային մատակարարող ողջ Մերձավոր Արևելքում տարածվող քաղաքական ճգնաժամի պայմաններում:
