«Առաջին լրատվական»-ը ԱԺ ՀՀԿ-ական պատգամավոր Հովհաննես Սահակյանից հետաքրքրվեց, թե «Ընտրական օրենսգրքի» փոփոխությունները որքանով կարող են նպաստել, որպեսզի ընտրությունների ժամանակ ընտրատեղամասերում լրագրողը, դիտորդը, վստահված անձը կամ ընդդիմադիր քաղաքական գործիչը ապահովագրված լինեն օլիգարխների թիկնապահների կամ քրեական տարրերի հարձակումներից:
«Դրանք մասնավոր դեպքեր են: Եթե կան նման երևույթներ, ապա առօրյա կյանքում էլ կարող են դրանք հանդիպել` լինի լրագրող, թե քաղաքացի: Ես, որպես հայ մարդ և քաղաքական գործիչ, չեմ կարող տարանջատել հայ քաղաքացուն լրագրողից: «Ընտրական օրենսգիրքն» էլ ավելի է լեգիտիմացրել, էլ ավելի է ազատականացրել լրագրողական դաշտը, որպեսզի լրագրողները կարողանան ազատ լուսաբանել: Այդ տեսախցիկները, որ տեղադրվեն, ընտրատեղամասում որևէ դեպք, ընտրախախտում, որը տեղի է ունենում տվյալ տեղամասում և ընտրական պրոցեսը խաթարում է, կնկարեն: Բռնության փաստը արդեն ապացույց է, որ հետագայում լրագրողը, քաղաքացին կարողանա իր շահերը պաշտպանել»,- արձագանքեց Հովհաննես Սահակյանը:
ԱԺ պատգամավորին հիշեցրինք, որ գործող «Ընտրական օրենսգրքում» էլ գրված չէ, որ պետք է լրագրողին ծեծել կամ ընտրողին կաշառել, ընտրություն կեղծել, մինչդեռ այդ բոլորը տեղի են ունենում, և «Ընտրական օրենսգիրքն» էլ չի գործում: Փոփոխություններն ի՞նչ պետք է փոխեն:
«Իրականությունը մենք ուզում ենք փոխել և ուզում ենք համոզել, որ այդ փոփոխությունները նպաստավոր են ժողովրդի համար»,- ասաց իշխող` Հանրապետական կուսակցության ներկայացուցիչը: