Անցած շաբաթվա վերջում` հունվարի 29-ին, Սերժ Սարգսյանը հանդիպել է «ԵՊՀ շրջանավարտների միության» նախաձեռնությամբ կառուցվող շենքի շահառուների հետ:
Հանդիպումն անցել է բավականին լարված մթնոլորտում, որովհետև շահառուները չեն թաքցրել իրենց դժգոհությունը: Նրանք դժգոհել են նախ շենքի շահագործման հանձնումը ուշացնելուց, քանի որ շենքը, ըստ երկկողմանի պայմանագրի, պետք է շահագործման հանձնվեր դեռևս 2010 թվականի հունիսին, սակայն շահառուների հետ համաձայնության գալով` հայտարարվել էր, որ շենքը կհանձնվի դեկտեմբերի վերջին:
Նշենք, որ շենքի շինարարությունն իրականացնում են «ԵՊՀ շրջանավարտների միությունը», որի փաստացի ղեկավարը Սպորտի և երիտասարդության հարցերի փոխնախարար Արսեն Քարամյանն է, և Glendel Hills շինարարական կազմակերպությունը:
Չկարողանալով դեկտեմբերին շահագործման հանձնել շենքը` Արսեն Քարամյանը, ում անթաքույց հովանավորում է նախագահի թիկնազորի պետ Վաչիկ Ղազարյանը, կարողացել էր համոզել շահառուներին, որ արդեն շենքը պատրաստ է, մեկ անգամ ևս պետք է հեռուստաեթերից շնորհակալություն հայտնել Սերժ Սարգսյանին, և հունվարի 29-ին «Հարսնաքար» ռեստորանում արդեն դահլիճ է պատվիրված` բնակարանների բանալիներն անձամբ Սերժ Սարգսյանից ստանալու համար:
Սակայն հունվարի 29-ին ևս այդ արարողությունը չկայացավ, քանի որ շենքը դեռևս պատրաստ չէ շահագործման: Փոխարենը Սերժ Սարգսյանը հանդիպեց շահառուների հետ` բողոքը հասարակության քննարկման առարկա չդարձնելու համար:
Շահառուների մյուս հիմնական բողոքն այն էր, որ շենքը կառուցվել է անբարեխիղճ ձևով: Թեև պայմանագրով շահառուն ինքը պետք է ընտրեր սալիկների գույնը, դռների ձևը և այլն, սակայն ներքին հարդարանքի վերաբերյալ գրավոր ձևակերպված ոչ մի ցանկություն հաշվի չի առնվել: Բացի այդ, կատարվել են մի շարք աբսուրդ նորամուծություններ: Օրինակ` շենքում բնակարանների հատակը ջեռուցվում է, սակայն վրայից տեղադրել են փայտե մանրահատակ:
«Առաջին լրատվականի» աղբյուրները վկայում են, որ Սերժ Սարգսյանը հանդիպումից հեռացել է բավական վրդովված, ինչը երևացել է նաև շաբաթ օրը տեղի ունեցած ԵՊՀ խորհրդի նիստի ժամանակ:
Ըստ մեր ունեցած տեղեկությունների` Սերժ Սարգսյանը մտադրվել է առաջիկայում պաշտոնանկ անել շենքի թիվ մեկ պատասխանատուին` Արսեն Քարամյանին:
Նշենք նաև, որ շահառուների հետ հանդիպումից հետո Արսեն Քարամյանը պառկած է հիվանդանոցում:
