Թուրքական Akşam թերթի փոխանցմամբ՝ Թուրքիայի վարչապետ Ռեջեփ Էրդողանը սկսել է նախապատրաստվել 2014 թվականի մարտին կայանալիք տեղական ինքնակառավարման մարմինների (ՏԻՄ) ընտրությանը:
Այդ պլանում Էրդողանը մատնացույց է արել Թուրքիայի հարավարևելյան հատվածում ընկած երեք նահանգները, որոնցում 2009 թվականին տեղի ունեցած ՏԻՄ ընտրություններում հաղթանակ էր տարել քրդական կուսակցությունը, և որոնցում հաջորդ անգամ անպայմանորեն պետք է հաղթի իր գլխավորած «Արդարություն ու զարգացում» կուսակցությունը (ԱԶԿ):
Խոսքը Դիարբեքիրի, Վանի և Մարդինի նահանգների մասին է: Էրդողանն արդեն իսկ իր կուսակիցներին համապատասխան կարգադրություն է արել դրանցում հաղթանակ տանելու ուղղությամբ քայլեր ձեռնարկելու մասին: Այն, որ Էրդողանն այդ ընտրություններից 2 տարի առաջ սկսել է պատրաստվել դրանց, խոսում է ընտրություններին և հարավարևելյան տարածաշրջանին նրա տված կարևորության մասին:
Հիշեցնենք, որ սրանից մեկուկես ամիս առաջ թուրքական լրավամիջոցները գրեցին, թե ԱԶԿ-ն ցանկանում է ՏԻՄ ընտրություններն անցկացնել նախատեսվածից 6 ամիս շուտ՝ 2013 թվականի աշնանը: ԱԶԿ-ն դա պատճառաբանում է մեկ տարում երկու ընտրություններ անցկացնելու անհարմարավետությամբ:
Խոսքը 2014 թվականի մարտին և օգոստոսին կայանալիք համապատասխանաբար ՏԻՄ և նախագահական ընտրությունների մասին է: Եթե ԱԶԿ-ի նախաձեռնությունը հաջողվի, ապա առաջիկա երեք տարիներին Թուրքիայում կանցկացվեն ընտրություններ. 2013 թվականին՝ ՏԻՄ, 2014 թվականին՝ նախագահական և 2015 թվականին (հունիս)՝ խորհրդարանական ընտրություններ:
2009 թվականի մարտի 29-ին Թուրքիայում տեղի ունեցած ՏԻՄ ընտրություններում ԱԶԿ-ն հավաքել էր քվեների 38.39 տոկոսը (15.353.553 քվե) և ստացել էր 1889 տեղ: Ժողովրդա-հանրապետական կուսակցությունը (ԺՀԿ) ստացել էր քվեների 23.08 տոկոսը (9,229,936 քվե) և 612 տեղ: «Ազգայնական շարժում» կուսակցության (ԱՇԿ) ցուցանիշներն ավելի համեստ են՝ 15.97 տոկոս, 6,386,279 քվե, 414 տեղ:
Իսկ Ահմեդ Թուրքի գլխավորած քրդական «Ժողովրդավարական հասարակարգ» կուսակցությունը հաղթանակ տարավ Թուրքիայի հարավարևելյան քրդաբնակ բոլոր նահանգներում՝ բացառությամբ Բիթլիսի՝ հավաքելով քվեների 5.7 տոկոսը (2,277,777 քվե) և ստանալով 235 տեղ: Նույն թվականի դեկտեմբերի 11-ին Թուրքիայի Սահմանադրական դատարանի որոշմամբ այդ կուսակցությունը փակվեց:
